Qashqadaryolik erkak afg‘onistonlik fuqaroni 53,5 ming dollarga chuv tushirgani aniqlandi

Qashqadaryolik erkak afg‘onistonlik fuqaroni 53,5 ming dollarga chuv tushirgani aniqlandi. Bu haqda Bosh prokuratura xabar berdi. 

Ma’lum qilinishicha, Dehqonobod tumanida yashovchi fuqaro E.N. Afg‘oniston fuqarosi H.G‘.dan 2021-yilda tojik kovragi smolasini yetkazib berishni va’da qilib, uning ishonchiga kirgan. Undan 53,5 ming AQSH dollari miqdorida pullarni olib, tojik kovragi smolasini yetkazib bermagan va pulni ham bermasdan aldab kelgan. 

Prokuratura organlari tomonidan H.G‘.ning murojaati o‘rganilib, natijasiga ko‘ra E.N.ga nisbatan jinoyat ishi qo‘zg‘atilib, hozirda tergov harakatlari Bosh prokuratura tomonidan olib borilmoqda.

Dastlabki tergov davomida, xorijiy davlat fuqarosi H.G‘.ga yetkazilgan zarar hisobiga 500 million so‘mga yaqin mablag‘ undirildi.

Bundan avval Buxoroga ketayotgan afg‘onistonlik fuqaro poyezdda yukini yo‘qotib qo‘ygani haqida xabar berilgandi.