Qashqadaryo viloyati Dehqonobod tumanida tojik kavragi o‘simligiga yana shikast yetkazildi. Bu haqda Ekologiya, atrof-muhitni muhofaza qilish va iqlim o‘zgarishi vazirligi xabar berdi.
Dehqonobod tumani Ekologiya boshqarmasi ishchi guruhi tomonidan o‘tkazilgan o‘rganish davomida “Dehqonobod kelajak tomorqa xizmati” MCHJ hududida 815 tup kavrak o‘simligiga zarar yetkazilgani aniqlangan.
Shuningdek, hududdan 0,50 gramm tojik kavragi smolasi, 4 dona maxsus kavrak o‘simligi ildizini kesishga mo‘ljallangan pichoq, 3 dona tosh qayroq, 5 dona maxsus qo‘lda yasalgan idish va kesib, taxlab qo‘yilgan karton qog‘ozlar topilib, daliliy ashyo sifatida vaqtinchalik olib qo‘yilgan.
O‘rganish natijasida o‘simlik dunyosiga jami 403 million 425 ming so‘m miqdorida zarar yetkazilgan. Holat yuzasidan to‘plangan hujjatlar prokuraturaga yuborilgan.
Qashqadaryoning Dehqonobod tumanida bunday holat 16-iyul va 21-iyul kunlari ham qayd etilgandi. Birinchi holatda 372 million 735 ming so‘m, ikkinchisida 1 milliard 253 ming so‘m zarar yetkazilgandi.
Ma’lumot uchun, O‘zbekiston Qizil kitobiga kiritilgan tojik kavragi o‘simligiga 2023-yildan boshlab 3 yilga moratoriy joriy etilgan.
Izoh (0)