O‘z davrida Disney’ning barcha rekordlarni yangilagan va ko‘plab aktyorlarga olamshumul mashhurlik keltirgan “Hanna Montana” seriali qahramoni, xonanda Mayli Sayrus eng yosh Disney afsonasi deb topildi. Bu haqda Europa Plus xabar bermoqda.
DisneyD23 marosimida Mayli Sayrus eng yosh Disney afsonasi unvoniga sazovor bo‘lgach, ko‘z yoshlarini tiya olmadi. Ushbu unvon Disney olami rivojiga katta hissa qo‘shgan va o‘chmas iz qoldirgan iste’dodlarga beriladi.
Sayrus 12 yoshidan boshlab Hanna Montana obrazini xuddi shu nomli serialda gavdalantirgan va 2005-yildan 2010-yilgacha mazkur ijodiy taxallusi ostida qo‘shiqlar ijro etgan.
“Qo‘limdagi mukofot Hanna va uning barcha ajoyib, sodiq muxlislari hamda mening orzuyimni amalga oshirgan barcha insonlarga bag‘ishlangan. Men Hanna Montana bo‘lganimdan faxrlanaman”, dedi xonanda.
Sahnaga chiqayotib, Sayrus, albatta, “yig‘lab yuborishini bilar edi”. So‘ng yulduz barcha yosh iste’dodlarni qo‘llab-quvvatlashini aytdi:
“Avvalo, men barchaga Disney afsonalari haqidagi kichik sirni ochmoqchiman. Sahna ortidagi sirlarni fosh qiladigan birinchi odam bo‘lmoqchiman. Bilingki, afsonaviy insonlar ham qo‘rquvni his qiladi. Men hozirda qo‘rqyapman... Qo‘rqib turib ham g‘alaba tomon intilish eng afsonaviy ishdir”, dedi Sayrus.
Izoh (0)