Madridning “Real” klubi “Benfika” safida to‘p surayotgan chap qanot himoyachisi Alvaro Karrerasni o‘z safiga qo‘shib olishga yaqin turibdi. Bu haqda taniqli insayder Fabrisio Romano o‘zining ijtimoiy tarmoqdagi sahifasida ma’lum qildi.
Manbaga ko‘ra, muzokaralar doirasida “Real”ning yoshlar jamoasi futbolchisi, chap qanot himoyachisi Rafael Obradorning “Benfika”ga o‘tishi ham ko‘rib chiqilmoqda. Transfer bo‘yicha kelishuv deyarli yakuniy bosqichga yetgan va Obrador yaqin kunlarda portugaliyaliklar safiga qo‘shilishi kutilmoqda. Karreras transferi esa Klublar o‘rtasidagi Jahon chempionati yakunlangach rasman e’lon qilinadi.
Ma’lumot uchun, Karreras 2017-yildan 2020-yilgacha “Real”ning yoshlar jamoasida to‘p surgan. Shundan so‘ng u erkin agent sifatida “Manchester Yunayted” safiga qo‘shilgan. Angliya klubi 2024-yilda uni 6 million yevro evaziga “Benfika”ga transfer qilgan edi.
Eslatib o‘tamiz, Alvaro Karreras o‘tgan mavsum “Benfika” safida jami 52 ta o‘yinda maydonga tushib, 4 ta gol va 5 ta golli uzatmaga mualliflik qilgan. Uning klub bilan amaldagi shartnomasi 2029-yil yozigacha mo‘ljallangan. Transfermarkt portali futbolchining bozor qiymatini 35 million yevroga baholagan.
Izoh (0)