Madridning “Real” klubi hujumchisi Kilian Mbappe Klublar o‘rtasidagi Jahon chempionati chorak final bosqichidagi “Borussiya Dortmund”ga qarshi o‘yinda (3:2) kiritgan goli bilan klub tarixida ilgari hech bir futbolchi erisha olmagan rekordni yangiladi. Bu haqda Stats Foot nashriga tayanib Championat xabar berdi.
Manbaga ko‘ra, fransiyalik hujumchi bir mavsum ichida “Real” safida yettita turli turnirda ishtirok etib, ularning barchasida gol urgan ilk futbolchiga aylandi. Hozirga qadar “qirollik klubi”ning hech qanday a’zosi bunday natijaga erisha olmagan edi.
Mbappe statistikasi quyidagicha:
- La Liga — 31 gol
- UEFA Chempionlar Ligasi — 7 gol
- Ispaniya Kubogi — 2 gol
- Ispaniya Superkubogi — 1 gol,
- UEFA Superkubogi — 1 gol,
- Klublar o‘rtasidagi Jahon chempionati — 1 gol,
- Qit’alararo kubok — 1 gol.
Ma’lumot uchun, joriy mavsumda Mbappe jami 58 o‘yinda maydonga tushib, 44 ta gol muallifiga aylangan.
Eslatib o‘tamiz, Kilian Mbappe sog‘lig‘i bilan bog‘liq muammolar tufayli 2025-yilgi Klublar o‘rtasidagi Jahon chempionatining guruh bosqichida maydonga tusha olmagan edi. Turnir yarim finalida “Real Madrid” hujumchining sobiq klubi — Parijning “PSJ” jamoasiga qarshi bahs olib boradi. Bahs 9-iyuldan 10-iyulga o‘tar kechasi O‘zbekiston vaqti bilan 00:00 da start oladi.
Izoh (0)