Farg‘ona viloyatida o‘rtaga katta miqdorda pul tikib, qimor o‘yini tashkil etgan jinoiy guruh qo‘lga olindi. Bu haqda viloyat IIB axborot xizmati xabar berdi.
Ma’lum qilinishicha, IIB tezkor xodimlari tomonidan o‘tkazilgan tadbir davomida Quva tumani “Qalinpo‘stin” MFYda yashovchi 62 yoshli A.T. jinoiy sherigi “Qayrag‘och” MFYda yashovchi 50 yoshli N.M. bilan bir guruh bo‘lib, qimor va tavakkalchilikka asoslangan xo‘roz o‘yini tashkil qilgan. Ular ushbu jinoiy faoliyatga yana uch nafar shaxsni sherik qilib, Farg‘ona shahar “Mustaqillik” MFYda 400 nafar ishtirokchini jalb qilgan holda “Xo‘roz urishtirish” uchun sharoit yaratib, ishtirokchilarning har biridan 50 ming so‘mdan pul yiqqan vaqtda ushlangan.
Bundan tashqari, tadbir davomida kassadan 84 million 356 ming so‘m, 3 750 dollar, 8 ming 741 Qirg‘iziston somi, qimor o‘yinga kelgan shaxslardan 14 million so‘m pullar, 14 dona xo‘roz va boshqa buyumlar ashyoviy dalil sifatida olingan.
Mazkur holat yuzasidan tergovga qadar tekshiruv harakatlari olib borilmoqda.
Eslatib o‘tamiz, 2022-yilda Namangan viloyat huquqni muhofaza qiluvchi organ xodimlari tomonidan o‘tkazilgan tezkor tadbirda Pop tumanida xo‘roz urishtirish o‘yinlarini tashkil qilgan shaxslar faoliyatiga chek qo‘yilgandi.
Izoh (0)