Livanning shimolidagi Bednayel qishlog‘ida xo‘roz boqish taqiqlandi. Bu haqda Arab News xabar berdi.
Taqiq kunduzi baland shovqinlarning oldini olishga va jamoat tartibini saqlashga qaratilgan. Qaror Al-Qura viloyati Bednayel munitsipaliteti rahbari Salohiddin Al-Ayyubiy tomonidan chiqarilgan.
“Qishloq uylarida xo‘rozlarni saqlash noqonuniy, chunki ular baland ovozda qichqirib, tartibsizlik va qo‘lansa hid keltirib chiqaradi. Nafaqat xo‘rozlar, balki tovuq va boshqa hayvonlar ham jamoat tartibini buzadi. Ko‘plab aholi kunduz kuni xo‘rozlar qichqirayotganidan shikoyat qilgan. Shu sababli men shunday qaror chiqardim”, degan Al-Ayyubiy.
Qaror ijtimoiy tarmoqlarda shov-shuvga sabab bo‘lgan. Internet foydalanuvchilarining aksariyati Al-Ayyubiyni tanqid qilmoqda. Qishloq aholisiga shovqin yoki tartibsizlik keltirib chiqaruvchi hayvonlardan xalos bo‘lish uchun 10 kun muhlat berilgan.
“Afsuski, ko‘plab qishloq aholisi qarorni noto‘g‘ri talqin qildi. Ba’zilar tovuqlar qanday qilib xo‘rozlarsiz tuxum qo‘yishi mumkinligi haqida so‘ragan. Xo‘rozsiz ham tovuqlar tuxum qo‘yaveradi”, dedi Al-Ayyubiy.
Qo‘shimcha qilinishicha, qarorda jamoatchilikni bezovta qilayotgan boshqa bir qator omillar ham muhokama qilingan.
“Men xo‘roz boqishga to‘sqinlik qilmayapman. Kimda-kim xo‘roz boqmoqchi bo‘lsa, bemalol. Faqat uylar orasida emas. Shuning uchun xo‘rozlarni uylardan uzoqda va erkin holatda salqash mumkin”, degan u.
Uy hayvoniga ega bo‘lgan har bir kishi tozalikni saqlashi, shovqinni cheklashi va hayvonlarning nazoratsiz yurishiga yo‘l qo‘ymasligi kabi zarur choralarni ko‘rish kerak.
Qarorga ko‘ra, baland shovqinli motosikllarni boshqarish ham taqiqlanadi. Qoidabuzarlarning motosikli jarima maydonchasiga joylashtiriladi, haydovchisi esa jarimaga tortiladi.
Izoh (0)