Jaziramada konditsionerning salomatlikka zararining oldini olish uchun xonada o‘tirganda vaqti-vaqti bilan o‘chirib qo‘yish yoki sovuq havo oqimi urmaydigan joyga o‘tib olish mumkin. Bu haqda Milliy tibbiyot markazining Maslahat poliklinikasi kardiolog shifokori Alisher Najmiddinov tavsiyalarida aytib o‘tdi.
Konditsionerning o‘zi shamollashga olib kelmaydi
Tadqiqotlar natijalariga ko‘ra, konditsionerning o‘zi shamollashga olib kelmaydi. Chunki bu kasallik kelib chiqishiga sovuq havo emas, balki mikroorganizmlar sabab bo‘ladi. Biroq o‘ta sovuq muhitda uzoq vaqt bo‘lish immun tizimini zaiflashtiradi. Bu esa tanani infeksiyalarga qarshi himoyasiz qilib qo‘yishi mumkin.
Bundan tashqari, inson tanasida harorat pasaygandan so‘ng, qon tomirlari torayadi. Bu qon oqimini susaytiradi. Natijada immun hujayralarining tomoq va burun shilliq pardalariga yetkazib berilishi tezligini sekinlashtiradi. Ko‘pincha, aynan shu organlar bakteriyalar va viruslar uchun kirish joyi bo‘lgani sababli, bunda infeksiya rivojlanishi ehtimoli ortadi.
Shuningdek, haroratning keskin o‘zgarishi, yaʼni sovitilgan xona yoki avtomobildan birdaniga jaziramaga chiqish ham tanani stressga tushirib qo‘yadi. Bu vaqtda stress gormonlari ishlab chiqariladi. Uzoq muddat bu hol takrorlansa, immunitet tushib ketishi mumkin.
Xonada nima qilish kerak?
Xonada o‘tirganingizda konditsionerni vaqti-vaqti bilan o‘chirib qo‘yishingiz yoki sovuq havo oqimi urmaydigan joyga o‘tib olishingiz mumkin. Ammo transportda bo‘lganingizdachi? O‘zingizni asrash uchun nimalar qilishingiz mumkin?
Mashinada nima qilish kerak?
Avtomobilda bo‘lganingizda, quyidagi qoidalarga rioya qilishga harakat qiling. Mashinani haydashdan oldin salonni yaxshilab shamollating. Sovuq havoni yuz va ko‘krak qismingizga yo‘naltirmang. Haroratni asta-sekin ko‘taring yoki pasaytiring.
Shamollab qolsa nima qilish kerak?
Agar barcha urinishlaringiz besamar ketib, baribir shamollab qolgan bo‘lsangiz, nima qilish kerak? Simptomlarni yengillashtiradigan mahalliy taʼsir qiluvchi vositalardan foydalaning. Hech qanday holatda shifokor tavsiyasisiz antibiotiklar bilan davolanmang.
Bundan tashqari, tomoq og‘rig‘i uchun yaxshi o‘rganilgan antioksidant bo‘lgan C vitamini mavjud vositalar ham davodir. Odatda bunday mahalliy davolanish yetarli bo‘ladi.
Izoh (0)