Yoz — ko‘ngil ochish, tabiatdan zavqlanish, yaqinlar bilan sayohat qilish davri. Shu bilan birga, aynan shu faslda biz odatiy holga aylangan ba’zi zararli odatlarni davom ettiramiz yoki o‘zimiz bilmagan holda sog‘lig‘imizga putur yetkazadigan xatolarga yo‘l qo‘yamiz. Quyida yozda keng tarqalgan va ko‘pchilik e’tibordan chetda qoldiradigan xatolar haqida so‘z yuritamiz.
- Bolalarga slash ichimlik taklif qilish
Bugungi kunda juda mashhur bo‘lgan slash ichimliklar bolalar salomatligi uchun xavfli bo‘lishi mumkin. Ba’zi ota-onalar “shakarsiz” degan yozuvga ishonib, bolalariga bunday ichimlikni olib berishadi. Aslida esa, slash tarkibidagi muzning tez erib ketmasligi uchun unga glitserin qo‘shiladi, bu esa bola organizmida zaharlanish alomatlarini chaqirishi mumkin. Bunda qondagi shakar miqdori keskin tushib ketadi, qorni dam bo‘ladi, uyqu bosadi. Uzoq muddat iste’mol qilinganda yanada jiddiy muammolar yuzaga keladi.
Eng yaxshi yechim — uy sharoitida bola bilan birgalikda limonad tayyorlash. Bu nafaqat foydali, balki farzandlar bilan birgalikda qiziqarli vaqt o‘tkazish hamdir.
- Parfyumdan foydalanish
Mutaxassislar yozda atirlardan voz kechishni tavsiya qiladi, chunki ayrim xushbo‘y iforlardagi ayrim elementlar quyosh nurlariga sezuvchanlikni oshiradi, natijada terida pigment dog‘lari paydo bo‘ladi. Shuningdek, kosmetik vositalardagi efir moylari ham terini yallig‘lanishga olib kelishi mumkin.
Agar parfyumdan butunlay voz kechishni istamasangiz, uni faqat quyosh tushmaydigan joylarga seping. Atirni kiyimga sepish ham mumkin, ammo u ba’zi matolarda dog‘ qoldirishi mumkinligini unutmang.
- Konditsionerni noto‘g‘ri sozlash
Ko‘pchilik konditsionerni noto‘g‘ri ishlatib, elektr energiyasi sarfini oshirib yuboradi. Masalan, tashqarida havo haddan tashqari issiq bo‘lsa qurilmani juda past haroratga sozlash eng keng tarqalgan xatodir. To‘g‘ri yo‘l: haroratni unchalik past bo‘lmagan darajada ushlash va uni o‘chirib-yoqib yurmaslikdir. Shunda nafaqat doimiy salqinlik ta’minlanadi, balki energiyani ham tejaladi.
Eng muhimi, konditsioner bo‘lsa ham, xonani shamollatishni unutmang. Aks holda nafas olishda qiyinchilik, hatto suvsizlanish yuzaga keladi.
- Quyoshda yugurish
Yozda ko‘pchilik ochiq havoda sport bilan shug‘ullanishga harakat qiladi, biroq issiq kunda yugurish sportga endigina kirib kelganlar uchun jiddiy xavf tug‘diradi. Hatto tajribali sportchilar ham yozda ehtiyot bo‘lishlari kerak. Eng to‘g‘ri yo‘l — sport zaliga o‘tish yoki mashg‘ulot vaqtini erta tong yoki kechga surish.
- Hasharotlarga qarshi vositalardan foydalanmaslik
Repellentlar (hasharotlarni haydovchi va terini himoya qiluvchi vositalar) pashsha va chumolilarni hamda xavfli kasallik tarqatuvchi chivin va kanalardan ham himoya qiladi. Ulardan voz kechish kasallik xavfini orttirish demakdir.
- Quyoshdan saqlovchi ko‘zoynak va bosh kiyimsiz tashqariga chiqish
Issiqda bosh kiyimsiz yurish va ko‘zlarni ultrabinafsha nurlardan himoya qilmaslik sog‘liq uchun jiddiy xavf tug‘diradi, shuning uchun yozda keng qirrali shlyapa, panama yoki sifatli quyosh ko‘zoynagi bo‘lishi kerak.
Izoh (0)