Nepalda so‘nggi bir oy ichida musson yomg‘irlari bilan bog‘liq hodisalarda 30 dan ortiq odam hayotdan ko‘z yumdi, 150 kishi jarohatlandi. Bu haqda Hindu gazetasi xabar qildi.
Nepalda may oyining oxirida yomg‘irlar mavsumi boshlanishi bilan kuchli yog‘ingarchilik oqibatida 674 ta hodisa ro‘y berdi. Mamlakatda suv toshqinlari, ko‘chkilar, chaqmoq urishlari, kuchli shamollar kuzatildi. Natijada 31 kishi halok bo‘ldi, yana 151 kishi tan jarohati olgan, bir kishi bedarak yo‘qolgan.
Ko‘chkilar tufayli mamlakatning bir qator hududlarida o‘nlab uylar shikastlandi yoki butkul vayron bo‘ldi. Iqtisodiy zarar taxminan 2,5 million AQSH dollariga yetdi. Mamlakat qutqaruv xizmatlari jabrlanganlarga yordam ko‘rsatish va xavfli hududlardan aholini ko‘chirish ishlarini davom ettirmoqda. Nepalda suv toshqinlari va ko‘chkilardan zarar ko‘rgan oilalar soni 1 mingdan oshib ketdi.
Nepalda yomg‘irlar mavsumi may oyining oxiridan sentyabrgacha davom etadi. Uning avj nuqtasi iyul oyiga to‘g‘ri keladi. Bu davrda mamlakatda yillik yog‘ingarchilik miqdorining 80 foizga yaqini yog‘adi. Hukumat vakillari kelgusi haftalarda kuchli yomg‘ir yog‘ishi va ko‘chkilar xavfi yuqori ekanligini hisobga olib, aholini ehtiyot choralarini ko‘rishga chaqirdi.
Bundan avval Nigeriyaning Niger shtatida joylashgan Mokva savdo shaharchasida kuchli yomg‘irlar va undan keyin yuz bergan suv toshqini oqibatida kamida 88 kishi halok bo‘lgani xabar qilingandi.
May oyida Hindistonning Uttar-Pradesh shtatida momaqaldiroqli jala oqibatida kamida 45 kishi hayotdan ko‘z yumdi.
Avstraliyaning janubi-sharqida yog‘gan yomg‘ir qisqa muddatli toshqinlarni keltirib chiqargan, ko‘plab shaharlarni tashqi dunyodan uzib qo’ygan va aholi uy tomlarida jon saqlayotgani xabar qilingandi.
Izoh (0)