Xorazmda tuman sudining tergov sudyasi pora bilan qo‘lga tushdi. Bu haqda Oliy sud xabar berdi.
Oliy sud tashabbusi bilan huquqni muhofaza qiluvchi organ xodimlari tomonidan 2-iyulda o‘tkazilgan tezkor tadbirda jinoyat ishlari bo‘yicha Yangiariq tuman sudining tergov sudyasi M.S. fuqaro O.R.ga oid jinoyat ishi bo‘yicha yordam berish evaziga muqaddam olgan pullarning bir qismini arizachining talabi bilan qaytargan vaqtida ashyoviy dalillar bilan ushlangan.
3-iyul kuni Sudyalar oliy kengashining yig‘ilishi bo‘lib o‘tdi. Unda Bosh prokurorning Xorazm viloyati jinoyat ishlari bo‘yicha Yangiariq tuman sudi tergov sudyasi M.S.ni Jinoyat kodeksining168- va 28,211-moddalari tegishli qismlari bilan jinoiy javobgarlikka tortishga oid taqdimnomasi muhokama qilindi.
Yakunda Kengash xulosasi bilan M.S.ni jinoiy javobgarlikka tortishga rozilik berildi va uning sudyalik vakolati to‘xtatildi.
Tergov siri va aybsizlik prezumpsiyasi talablaridan kelib chiqib, boshqa tafsilotlar oshkor qilinmadi.
Aprel oyining oxirlarida Toshkent shahridagi kafelarning biridan mast holda chiqqan va mashina o‘g‘irlashda gumonlangan Mirobod tuman sudi sudyasi vakolati muddatidan avval tugatilgandi. Unga nisbatan jinoyat ishi qo‘zg‘atilgan.
Shuningdek, Jinoyat ishlari bo‘yicha Xonobod shahar sudi raisiga jinoyat ishi qo‘zg‘atilgan.
Izoh (0)