Madridning “Real” klubi yozgi transfer oynasida “Liverpul” himoyachisi Ibrohim Konateni xarid qilish variantini ko‘rib chiqmoqda. Bu haqda Fransiyaning L’Equipe nashri xabar berdi.
Manbaga ko‘ra, “Real” vakillari allaqachon “Liverpul” bilan bog‘langan va futbolchini qo‘lga kiritish uchun qanday miqdordagi taklif mersisaydliklarni qanoatlantirishi mumkinligini so‘ragan. Dastlab, madridliklar 25 yoshli fransiyalik himoyachi uchun 20–25 million yevro miqdorida taklif yuborishi mumkin. Biroq “Liverpul” Konateni kamida 50 million yevro evaziga qo‘yib yuborishi mumkin.
Ta’kidlanishicha, transfer borasidagi muzokaralarga futbolchining shartnomasi ham ta’sir ko‘rsatishi mumkin. Konate va “Liverpul” o‘rtasidagi bitim 2026-yil yozigacha amal qiladi. Ingliz klubi uni keyingi yil tekinga qo‘yib yubormasligi uchun shu yozdayoq sotishga majbur bo‘lishi mumkinligi aytilmoqda.
Ma’lumot uchun, Ibrohim Konate 2021-yilda Germaniyaning “Leyptsig” klubidan “Liverpul”ga o‘tgan. Futbolchi o‘tgan mavsum “Liverpul” tarkibida 39 uchrashuvda maydonga tushib, 2 gol va 2 assist muallifiga aylangan. Transfermarkt portali fransuz himoyachisining narxini 60 million yevroga baholamoqda.
Eslatib o‘tamiz, “Real” yozgi transfer oynasi paytida “Liverpul”ning angliyalik himoyachisi Trent Aleksandr-Arnoldni erkin agent sifatida o‘z safiga qo‘shib olgan edi.
Izoh (0)