Yevropa futbolida yozgi transfer oynasi qizg‘in davom etmoqda. Mish-mishlar va yuz million yevroga yaqin baholangan kelishuvlar fonida bir narsani aniq aytish mumkin — bu yozda top-klublar katta mablag‘ sarflashdan cho‘chimayapti. Ular kuchli futbolchilarni o‘z safiga qo‘shib olib, yangi mavsumga jiddiy tarzda tayyorgarlik ko‘rmoqda. Shu bois hozirgacha xaridlar uchun eng ko‘p pul sarflagan jamoalar haqida to‘xtalamiz.
Angliya klublari — yetakchi
2025-yilgi transfer bozorida eng ko‘p xarajat qilgan jamoa — “Chelsi”. Klublar o‘rtasidagi Jahon chempionatining amaldagi g‘olibi yozda tarkibni yangilash uchun 244 million yevro ajratgan. “Aristokratlar” yozda “Borussiya D”dan Jeyms Gittensni salkam 65 million yevroga xarid qildi. Shuningdek, ular “Brayton” hujumchisi Jaou Pedro uchun 63 million yevro sarflashgan. Liam Delap (35,5 million yevro) va Estevan Villian (34 million yevro) kabi futbolchilarni ham o‘z safiga qo‘shib olgan.
Bu borada “Chelsi”ga Premyer Liga chempioni “Liverpul” raqiblik qilmoqda. Mersisaydliklar hozirga qadar yozgi transfer oynasida 214 million yevro sarflagan. “Qizillar” yozda eng katta xaridlaridan birini — “Bayer”dan Florian Virts transferini amalga oshirgan. “Liverpul” nemis futbolchisi uchun leverkuzenliklarga 125 million yevro sarfladi. Shuningdek, Milosh Kerkez (47 million yevro), Jeremi Frimpong (40 million yevro) va Armin (2 million yevro) transferlari uchun pul sarflagan.
Ushbu ikki ingliz klubi Yevropa transfer bozorida moliyaviy ustunlikni o‘z qo‘liga olib, katta xaridlarni amalga oshirishda davom etmoqda.
“Real Madrid” ham faol. “Qirollik klubi” o‘z tarkibiga yosh futbolchilarni qo‘shib olmoqda
“Real Madrid” yozda 180,5 million yevro sarflab, uchinchi o‘rinni egallamoqda. Klub Trent Aleksandr-Arnold, Franko Mastantuono, Alvaro Karreras va Din Xeysen kabi yosh va istiqbolli futbolchilarni olib kelib, kelajak uchun aniq strategiya tanlaganini ko‘rsatmoqda.
Jamoa ushbu xaridlar orasidan Mastantuono (45 million yevro), Karreras (50 million yevro) va Xeysen (63 million yevro) kabi futbolchilarga pul sarfladi. Arnold esa erkin agent sifatida jamoaga qo‘shildi. Biroq “qaymoqranglilar” ingliz futbolchisi uchun bonus to‘lashi haqida ma’lumot berilgan.
Shunga qaramay, “qaymoqranglilar” yoz yakuniga qadar yana bir yirik transfer bilan 200 millionlik chegara ham ortda qoldirishi mumkin.
“Tottenhem” va “Manchester Siti” kuchli beshlikka yakun yasadi
“Tottenhem” va “Manchester Siti” ushbu ro‘yxatning kuchli beshligiga yakun yasagan. “Shporlar” iyun oyining birinchi yarimgacha transferlar uchun 141 million yevro xarajat qilgan. “Manchester Siti” esa bu ko‘rsatkich 131 million yevroni tashkil qiladi.
Ushbu besh klub yozgi transfer oynasida eng faol ishtirokchilarga aylangan. Yangi loyihalar uchun sarmoyalar ortidan ayrimlar ustunlikni mustahkamlashni, boshqalar esa yana elit jamoa nomini qaytarib olishni maqsad qilgan.
Quyidagi ro‘yxat orqali yozgi transferlar oynasida eng ko‘p pul sarflagan 10 ta jamoa bilan tanishasiz. Qiziq tomoni, o‘tgan mavsum Chempionshipdan Angliya Premyer Ligasi yo‘llanmasini qo‘lga kiritgan “Sanderlend” ro‘yxatning 6-pog‘onasidan joy olgan.
Transferlar uchun eng ko‘p pul sarflagan jamoalar (top-10) (18.07.2025)
| 1 | “Chelsi” | 244 million yevro |
| 2 | “Liverpul” | 214 million yevro |
| 3 | “Real Madrid” | 180,5 million yevro |
| 4 | “Tottenhem” | 141 million yevro |
| 5 | “Manchester Siti” | 131 million yevro |
| 6 | “Sanderlend” | 116 million yevro |
| 7 | “Bayer Leverkuzen” | 102 million yevro |
| 8 | “Komo” | 88,5 million yevro |
| 9 | “Arsenal” | 87 million yevro |
| 10 | “Brayton” | 80 million yevro |
Izoh (0)