O‘zbekistonda “chiroyli” avtomobil raqami 800 million so‘mdan ortiqqa sotildi. Bu haqda Respublika tovar-xomashyo birjasi matbuot xizmati xabar berdi.
1-iyul kuni savdo platformasida 771 ta avtoraqam sotilgan. Shundan 755 tasini jismoniy shaxslar, qolgan 16 tasini esa yuridik shaxslar sotib olgan.
Shu kuni sotilgan eng arzon avtoraqam qiymati 1,9 million so‘m bo‘lgan. Eng qimmat avtoraqam qiymati esa 803,3 million so‘mni tashkil etdi. Bitimni yakunlash uchun xaridor to‘lovni amalga oshirishi va IIV Jamoat xavfsizligi departamenti Yo‘l harakati xavfsizligi xizmatida avtoraqamni rasmiylashtirishi kerak.
Bundan avvalgi eng qimmat “chiroyli” avtoraqam 20-may kuni 722,3 million so‘mga sotilgandi.
13-iyun kuni esa onlayn auksionda O‘zbekistonda “chiroyli” avtoraqam rekord darajada qimmat — 1,56 milliard so‘mga sotilgandi. Xaridor 10 777 ZZZ davlat raqami uchun shuncha pul taklif qilgan. Bu uning boshlang‘ich bahosi 187,5 million so‘mdan 8,3 baravar yuqori.
O‘zbekistonda 2024-yilda sotilgan eng qimmat “chiroyli” avtoraqam 01 888 BBB avtoraqami bo‘lib, 24-dekabrda 965,3 million so‘mga sotilgan. Bu qiymat Markaziy bank kursi bo‘yicha 74,77 ming dollarga teng. Dastlab 337 million 500 ming so‘m boshlang‘ich narx bilan savdoga qo‘yilgan bu avtoraqamning narxi auksion tugash vaqtiga qadar shuncha summaga ko‘tarilgan. 2023-yilda 01 777 RRR davlat raqami 893 million so‘mga sotilgandi.
Izoh (0)