Daniyalik erkak Eron razvedkasi uchun Berlindagi yahudiylar tashrif buyuradigan obyektlar va odamlar haqida ma’lumot to‘plaganlikda ayblanib, hibsga olindi. Bu haqda Fox News xabar berdi.
Ayblanuvchi Germaniyadan Daniyaga ekstraditsiya qilinishini kutilmoqda. Uning ismi maxfiylikni saqlash maqsadida Ali S deya yuritilmoqda. U 26-iyun kuni Daniyaning Orxus shahrida qo‘lga olingan.
Gumonlanuvchi binolarni, jumladan, Germaniya—Isroil jamiyati shtab-kvartirasini va yahudiylar markaziy kengashi prezidenti Yozef Shuster ba’zan to‘xtab o‘tadigan binoni suratga olgan.
“U 2025-yil boshida Eron razvedka xizmati tomonidan Berlindagi yahudiy aholi punktlari va muayyan yahudiy shaxslar haqida ma’lumot to‘plash uchun yuborilgan”, dedi prokurorlar.
Gumonlanuvchi iyun oyida 3 ta joyda josuslik qilganlikda ayblanmoqda. Taxminlarga ko‘ra, u keyingi razvedka faoliyatiga, jumladan, “teraktlarga tayyorgarlik ko‘rgan”. Eronning Germaniyadagi elchisi Majid Nili Ahmadabodiy 1-iyul kuni Germaniya Tashqi ishlar vazirligiga chaqirtirilgan. U bu da’volarni “asossiz va xavfli ayblovlar” deya baholagan.
“Agar ushbu shubha tasdiqlansa, bu Eron butun dunyo yahudiylari uchun tahdid ekanini yana bir bor namoyish etadigan dahshatli hodisa bo‘lardi”, dedi Germaniya tashqi ishlar vaziri Iogann Vadeful.
Germaniya xavfsizlik idoralari Isroil va Eron o‘rtasidagi 12 kunlik urushga javoban mamlakatdagi yahudiy obyektlarni himoya qilishni kuchaytirgan.
Izoh (0)