Qashqadaryo viloyatining Shahrisabz shahrida kredit mablag‘larini talon-toroj qilgan hokim yordamchisi va boshqalarga nisbatan jinoyat ishi qo‘zg‘atildi.
DXXning Qashqadaryo viloyati bo‘yicha boshqarmasi xodimlari tomonidan prokuratura organlari bilan hamkorlikda tekshiruv tadbirlari o‘tkazilgan. Tekshiruv davomida aniqlanishicha, Shahrisabz shahridagi mahalla fuqarolar yig‘inlaridan birining hokim yordamchisi F.A. mansab mavqeyidan foydalanib, to‘qimachilik, tikuvchilik va trikotaj sanoati uchun texnikalar ulgurji savdosiga ixtisoslashgan MCHJ rahbari R.M. bilan til biriktirib, 2022—2023-yillarda naslli chorva mollari sotib olish, parrandachilik, asalarichilik, tikuvchilik, issiqxona tashkil etish va boshqa maqsadlarda 14 nafar fuqaro nomidan imtiyozli kredit olish uchun shartnoma va hisob-faktura hujjatlariga elektron raqamli imzo orqali soxta maʼlumotlar kiritgan holda aksiyadorlik tijorat bankiga taqdim etgan.
Natijada, bank tomonidan 440,3 million so‘m kredit mablag‘i ajratilgan.
Bundan tashqari, hokim yordamchisi boshqa MCHJ rahbari X.S. bilan ham kelishib, 25 nafar fuqaro nomidan soxta maʼlumotlar taqdim etish orqali ATBdan 733,3 million so‘m kredit mablag‘i ajratilishiga erishgan.
Shu tariqa, jami 1 milliard 173,6 million so‘m kredit mablag‘i talon-toroj qilingan.
Hozirda hokim yordamchisi, MCHJ rahbarlari hamda boshqalarga nisbatan Jinoyat kodeksining 167 va 228-moddalari bilan jinoyat ishi qo‘zg‘atilib, tergov harakatlari olib borilmoqda.
Izoh (0)