AQSH prezidenti Donald Tramp o‘zlari orasida kelishmovchilik yuzaga kelgan milliarder Ilon Maskning biznesini barbod qilmasligini ma’lum qildi. Bu haqda Amerika rahbari Truth Social ijtimoiy tarmog‘idagi sahifasida yozdi.
“Hamma men AQSH hukumatining ko‘p miqdordagi subsidiyalarining ba’zilarini yoki barchasini olib qo‘yish orqali Ilonning kompaniyalarini vayron qilishimni aytmoqda. Unday emas! Men Ilon va mamlakatimizdagi barcha tadbirkorlar hech qachon bo‘lmaganidek rivojlanishini xohlayman. Ularning ahvoli qanchalik yaxshi bo‘lsa, AQShning ahvoli shunchalik yaxshi bo‘ladi”, deb yozdi Tramp.
Eslatib o‘tamiz, 29-may kuni Mask AQSH davlat samaradorligi departamentida (DOGE) maxsus davlat xizmatchisi sifatidagi rejalashtirilgan vakolat muddati tugayotganini ma’lum qilgan va Trampga hukumatning “behuda xarajatlarini kamaytirish imkoniyati” uchun minnatdorchilik bildirgan edi.
Iyun oyi boshida Mask va Tramp o‘rtasida AQSH prezidenti tomonidan federal xarajatlarni qisqartirish bo‘yicha taklif etilgan keng ko‘lamli qonun loyihasi tufayli ommaviy bahs-munozara kelib chiqdi. Mask buni “jirkanch razolat” deb atadi. Iyun oyi oxirida Mask Tramp bilan kelishmovchiliklar fonida AQShda yangi siyosiy partiya tuzishni yana bir bor taklif qildi va hozirda mamlakat “bir partiyali” ekanini aytdi. Tramp tadbirkorning qonun loyihasini tanqid qilishiga javoban subsidiyalarsiz “do‘konini yopib, JARdagi uyiga qaytishi” kerakligidan ogohlantirdi.
Iyul oyi boshida Mask o‘zining “Amerika” deb nomlangan siyosiy partiyasi tuzilganini e’lon qildi. Amerika saylov komissiyasining ro‘yxatidan ma’lum bo‘lishicha, u allaqachon uni ro‘yxatdan o‘tkazish uchun hujjatlarni rasman topshirgan. Tramp sobiq hamkorining “aqldan ozayotganini” achinish bilan kuzatayotganini aytdi.
Izoh (0)