AQSH prezidenti Donald Tramp 4-iyul kuni uning ma’muriyati savdo hamkorlariga 1-avgustdan boshlab Qo‘shma Shtatlarga tovarlar yetkazib berish uchun to‘lanishi kerak bo‘lgan bojlar miqdori haqidagi xabarnomalarni yuborishni boshlashini ma’lum qildi.
Ma’lum qilinishicha, Tramp jurnalistlarga ba’zi hollarda bojlar 60-70 foizni, boshqa hollarda esa 10-20 foizni tashkil etishini aytgan.
“O‘ylaymanki, to‘qqizinchi sanagacha (9-iyulgacha) biz hamma ishni tugatamiz”, deya Trampning so‘zlarini keltiradi Bloomberg.
Ta’kidlanishicha, prezident ilgari bojlarning yuqori chegarasini pastroq - 50 foizdan oshmaydigan darajada belgilagan.
Tramp aprel oyi boshida oshirilgan import bojlarini joriy etishni e’lon qilgan, biroq keyinchalik bu chorani 90 kunga kechiktirib, shu vaqt ichida savdo kelishuvlari bo‘yicha muzokaralar olib borgan edi. Muddat 9-iyulda tugaydi va avvalroq prezident uning uzaytirilmasligiga ishora qilgandi. Shu vaqt ichida Qo‘shma Shtatlar faqat uchta savdo bitimini tuzishga erishdi. Jumladan, Vyetnam, Xitoy va Buyuk Britaniya bilan asosiy kelishuvlar.
Ayni paytda Qo‘shma Shtatlar bir qator asosiy hamkorlar, jumladan, Yevropa Ittifoqi, Yaponiya, Hindiston va Janubiy Koreya bilan savdo shartnomalari bo‘yicha muzokaralarni davom ettirmoqda.
Avvalroq Tramp Yaponiya bilan muzokaralardagi siljishdan noroziligini bildirgan va mamlakat AQSHga tovarlar yetkazib berish uchun 30-35 foiz miqdorida boj to‘lashiga yo‘l qo‘ygandi. Moliya vaziri Skott Bessent Qo‘shma Shtatlar Hindiston bilan kelishuvga yaqinlashganini aytdi, biroq Yaponiya va Janubiy Koreya bilan muzokaralar so‘nggi haftalarda deyarli oldinga siljimagan.
Izoh (0)