Bizda ba’zi qadamlar avvalda binoyidek tashlanadi-yu, keyinroq negadir izlar boshqa tomonga ketayotganini payqab qolamiz. Masalan, Adliya vazirligining mahalliy davlat hokimiyati organlari tomonidan qabul qilinadigan qarorlarni ishlab chiqish, kelishish va ro‘yxatdan o‘tkazishning yagona elektron tizimi bo‘lgan “E-qaror” platformasi ishga tushirilganida buni keng jamoatchilik iliq kutib olgan edi.
Boshida ochiq qo‘yila boshlangan qarorlarda odamlar mas’ullar nima qilayotganini ko‘rib, o‘qib turdi, asosiysi, byudjet pullari, ya’ni o‘zlarining to‘lagan soliqlari qanday taqsimlanayotgani bo‘yicha jiddiy savollar o‘rtaga tashlandi, muhokamalar qilindi.
Nima bo‘ldi-yu e’lon qilinayotgan qarorlarning aksari yopiq shaklda, oddiy odamlar ko‘rolmaydigan va savol berolmaydigan qilib qo‘yila boshlandi.
Barchasida bitta tamg‘a: ushbu hujjat mazmunida shaxsga doir ma’lumotlar, vasiylik va homiylik yoki amaldagi qonunchilikka muvofiq boshqa turdagi foydalanishi cheklangan axborot mavjudligi tufayli yashirilgan.
Albatta, qaysidir normalarga ko‘ra qonuniy qilinayotgandir, lekin bu adolatlimi? Mazkur savol yuzasidan Adliya huquqni qo‘llashning metodik ta’minlash boshqarmasi bosh maslahatchisi Iskandarjon Islomov “Daryo”ga intervyu berdi.
Iskandarjon Islomovning ta’kidlashicha, Adliya vazirligi tomonidan “E-qaror” platformasi har kuni monitoring olib boradi.
“Joylardagi adliya bo‘limlari, boshqarmalari va vazirlik xodimlari uchta bosqichda har bitta qabul qilinayotgan qarorlarni o‘rganamiz. Shaxsan o‘zim ham, masalan, Toshkent viloyatidagi Bo‘ka tumani hokimligi yoki kengash qarorlarini birma-bir ko‘rib turaman.
Monitoring jarayonida tahlillar o‘tkazamiz, umumiy ma’lumotnomalar tayyorlaymiz. Bunda noqonuniy qaror aniqlansa, unga nisbatan ta’sir choralari qo‘llaymiz. Jarayonda yopiq yoki ochiq qarorlarni ham ko‘rib chiqamiz.
Platformada o‘tgan 6 oy davomida 63 ming 152 ta qaror qabul qilingan bo‘lsa, shundan 16 ming 309 tasi kengash qarorlari, 46 ming 843 tasi esa hokim qarorlaridir. Mazkur qarorlarning 20 ming 734 tasi — ya’ni uchdan bir qismi yopiq holda qabul qilingan”, dedi vazirlik mas’ul xodimi.
Eng ko‘p yopiq qarorlar viloyatlar kesimida:
1. Samarqandda — 3 ming 630 ta;
2. Xorazmda — 3 ming 438 ta;
3. Farg‘onada — 2 ming 232 ta;
4. Sirdaryoda — 2 ming 170 ta;
5. Buxoroda — 2 ming 160 ta.
Umumiy hisobda 1312 ta qaror noqonuniy joylangan bo‘lsa, shundan 811 tasi noto‘g‘ri ochiq holatda, 501 tasi esa yopiq holatda joylangan.
Izoh (0)