Бизда баъзи қадамлар аввалда бинойидек ташланади-ю, кейинроқ негадир излар бошқа томонга кетаётганини пайқаб қоламиз. Масалан, Адлия вазирлигининг маҳаллий давлат ҳокимияти органлари томонидан қабул қилинадиган қарорларни ишлаб чиқиш, келишиш ва рўйхатдан ўтказишнинг ягона электрон тизими бўлган “E-qaror” платформаси ишга туширилганида буни кенг жамоатчилик илиқ кутиб олган эди.
Бошида очиқ қўйила бошланган қарорларда одамлар масъуллар нима қилаётганини кўриб, ўқиб турди, асосийси, бюджет пуллари, яъни ўзларининг тўлаган солиқлари қандай тақсимланаётгани бўйича жиддий саволлар ўртага ташланди, муҳокамалар қилинди.
Нима бўлди-ю эълон қилинаётган қарорларнинг аксари ёпиқ шаклда, оддий одамлар кўролмайдиган ва савол беролмайдиган қилиб қўйила бошланди.
Барчасида битта тамға: ушбу ҳужжат мазмунида шахсга доир маълумотлар, васийлик ва ҳомийлик ёки амалдаги қонунчиликка мувофиқ бошқа турдаги фойдаланиши чекланган ахборот мавжудлиги туфайли яширилган.
Албатта, қайсидир нормаларга кўра қонуний қилинаётгандир, лекин бу адолатлими? Мазкур савол юзасидан Адлия ҳуқуқни қўллашнинг методик таъминлаш бошқармаси бош маслаҳатчиси Искандаржон Исломов “Дарё”га интервью берди.
Искандаржон Исломовнинг таъкидлашича, Адлия вазирлиги томонидан “E-qaror” платформаси ҳар куни мониторинг олиб боради.
“Жойлардаги адлия бўлимлари, бошқармалари ва вазирлик ходимлари учта босқичда ҳар битта қабул қилинаётган қарорларни ўрганамиз. Шахсан ўзим ҳам, масалан, Тошкент вилоятидаги Бўка тумани ҳокимлиги ёки кенгаш қарорларини бирма-бир кўриб тураман.
Мониторинг жараёнида таҳлиллар ўтказамиз, умумий маълумотномалар тайёрлаймиз. Бунда ноқонуний қарор аниқланса, унга нисбатан таъсир чоралари қўллаймиз. Жараёнда ёпиқ ёки очиқ қарорларни ҳам кўриб чиқамиз.
Платформада ўтган 6 ой давомида 63 минг 152 та қарор қабул қилинган бўлса, шундан 16 минг 309 таси кенгаш қарорлари, 46 минг 843 таси эса ҳоким қарорларидир. Мазкур қарорларнинг 20 минг 734 таси — яъни учдан бир қисми ёпиқ ҳолда қабул қилинган”, деди вазирлик масъул ходими.
Энг кўп ёпиқ қарорлар вилоятлар кесимида:
1. Самарқандда — 3 минг 630 та;
2. Хоразмда — 3 минг 438 та;
3. Фарғонада — 2 минг 232 та;
4. Сирдарёда — 2 минг 170 та;
5. Бухорода — 2 минг 160 та.
Умумий ҳисобда 1312 та қарор ноқонуний жойланган бўлса, шундан 811 таси нотўғри очиқ ҳолатда, 501 таси эса ёпиқ ҳолатда жойланган.
Изоҳ (0)