Dubaydagi yonilg‘i quyish shoxobchasida yuz bergan pichoqbozlik oqibatida O‘zbekistonning ikki fuqarosi halok bo‘ldi. Dubay jamoatchilik prokuraturasi aprel oyida sodir bo‘lgan mazkur hodisani tekshirmoqda. Bu haqda Khaleej Times xabar berdi.
Hodisa jabrlanuvchilar mashina shinalarini shishirish uchun shoxobchaga kelganlarida yuz bergan. Bunga eski kelishmovchilik sabab bo‘lgani taxmin qilinmoqda. Yaqin atrofda xizmat olib borayotgan politsiya xodimi voqea yuzasidan zudlik bilan tegishli idoralarga xabar bergan.
Tergovga ko‘ra, ikki guruh alohida transport vositalarida shoxobchaga yetib kelgan. Jabrlanuvchilardan biri qizil rangli Mercedes mashinasidan tushib, shinalarni tekshirayotgan vaqtida bir guruh erkaklar hujumiga uchragan. Shu paytda ikkinchi jabrlanuvchi voqea joyidan qochishga uringan, biroq ko‘p o‘tmay boshqa bir guruh tomonidan ushlangan.
Voqea joyiga yetib kelgan Dubay politsiyasi hududni qo‘riqlagan va jinoyatchilar qoldirgan ashyolarni yig‘ib olgan. Videokuzatuv yozuvlari hamda guvohlarning ko‘rsatmalari huquq-tartibot idoralariga voqea tafsilotlarini va hodisada ishtirok etgan shaxslarni aniqlashda yordam bergan.
Tezkor tergov ishlaridan so‘ng politsiya 11 nafar ishtirokchini, shu jumladan asosiy gumonlanuvchilarni qo‘lga olgan. Hibsga olinganlar so‘roq paytida mojaroga aloqador ekanini tan olgan.
Rasmiylar pichoqbozlik shaxsiy ziddiyatdan kelib chiqqani, unda bir-birini ilgari tanigan odamlar ishtirok etganini ta’kidlagan. Mazkur holat bo‘yicha qonuniy chora-tadbirlar ko‘rilishi uchun ish prokuraturaga topshirilgan. Dubay politsiyasi jamoatchilikni tinchlantirib, bunday zo‘ravonlik holatlari juda kam uchrashini va amirlik hanuz dunyodagi eng xavfsiz shaharlar qatorida ekanini ma’lum qildi.
Izoh (0)