Dubayga bir marta bo‘lsa ham tashrif buyurgan sayyoh yaxshi biladi: bu yerda sharqona hashamat eng so‘nggi texnologiyalar bilan uyg‘unlashgan. Bu hatto shahar politsiyasining avtomobil parkini ham chetlab o‘tmagan. Avtodrom yoki muzeylarda saqlanadigan qimmatbaho avtomobillarni Dubayning oddiy yo‘l qatnov joylarida ko‘rish mumkin.
Rolls-Royce Cullinan Mansory
Bu dabdabali avtomobil asosan oppoq rangda uchraydi. Uning kuzovida yashil rangli chiziqlar avtomobilning politsiyaga tegishli ekanini bildiradi.
Texnik ko‘rsatkichlari biroz farq qiladi: 12 silindrli, ikki turbinali dvigatel 610 ot kuchi ishlab chiqaradi. Bu deyarli Cullinan Black Badge modeli bilan bir xil, biroq maksimal tezlik 250 dan 280 km/soatga oshirilgan.
Mercedes-AMG GT 63 S
Ushbu to‘rt eshikli sportkar ajoyib dizayn va qulaylikni o‘zida birlashtiradi. 4 litrli, V8, ikki turbinali motor 639 ot kuchiga ega. Ushbu mashina 0 dan 100 km/soat tezlikka atigi 3,2 soniyada chiqadi.
Aston Martin One-77
Model nomidagi “77” tasodifiy emas: bu avtomobilning atigi 77 dona ishlab chiqarilganini anglatadi. Ulardan biri esa aynan Dubay politsiyasiga tegishli. 7,3 litrli, 750 ot kuchiga ega V12 dvigatelli Aston Martin One-77 350 km/soatdan yuqori tezlikka chiqadi.
Ford F-150 Raptor
Ushbu maxsus pikapdan shahar politsiyasi superkarlarining kuchi yetmagan joylarda foydalanadi. Yo‘ltanlamas Ford F150 Raptor 450 ot kuchiga ega, 3,5 litrli V6 EcoBoost dvigateli bilan jihozlangan bo‘lib, cho‘l sharoitida bemalol harakatlana oladi.
Tesla Cybertruck
Bu elektrokarni Checheniston rahbari uni sotib olganidan so‘ng, Dubay politsiyasi ham orqada qolmadi. Mustahkam po‘latdan ishlangan kuzov va futuristik dizaynga ega Tesla Cybertruck 200 km/soatdan yuqori tezlikka chiqadi.
Bugatti Veyron
Dubay politsiyasi ushbu giperkardan 2014-yilda foydalanishni boshlagan. Uning maksimal tezligi — 407 km/soat. Narxi 1,5 million yevrodan yuqori bo‘lgan bu avtomobil asosan reklama kampaniyalari yoki rasmiy tadbirlar uchun ishlatiladi. Bugatti Veyron hali-hanuz dunyodagi eng tez politsiya mashinalaridan biri hisoblanadi.
Bular Dubayga nima uchun kerak?
Bu savol ko‘pchilikni qiziqtiradi, lekin shuni unutmaslik kerak: Dubay — brendga aylangan shahar. Superkarlarga sarmoya kiritish hashamatli hayot tarzini reklama qilish bilan birga, kuchli marketing strategiyasi hamdir. Bunday eksklyuziv avtomobillar tufayli Dubay politsiyasi dunyo miqyosida yanada tanila boshlagan.
Izoh (0)