Germaniya kansleri Fridrix Merts Eronga qarshi zarbalari uchun Isroilni hurmat qilishini aytib, buni G‘arb ittifoqchilariga ko‘rsatilayotgan xizmat sifatida baholadi. Bu haqda Deutsche Welle xabar berdi.
Merts Kanadada bo‘lib o‘tgan G7 sammiti doirasida bergan intervyusida shunday bayonot bergan.
Shuni aytishim mumkinki, Isroil armiyasi va hukumatining bu ishga jur’at etgani menda katta hurmat uyg‘otadi. Aks holda, biz bu rejimning terrorini oylar va yillar davomida, keyinchalik esa, ehtimol, yadro qurolini qo‘lga kiritgan holda kuzatishga majbur bo‘lardik. Bu Isroil barchamiz uchun bajarayotgan “qora ish”. Biz ham bu rejimdan aziyat chekmoqdamiz, degan Germaniya kansleri.
Fridrix Merts Eronni Livandagi “Hizbulloh” va G‘azo sektoridagi HAMAS qo‘li bilan “hujumlar va qotilliklar orqali butun dunyoga o‘lim va vayronagarchiliklar” tarqatganlikda ayblagan. Kanslerga ko‘ra, 7-oktyabr kuni HAMAS jangchilarining Isroilga hujumi “Tehron rejimisiz hech qachon amalga oshmagan bo‘lardi”.
Agar Eron hukumati muzokaralar stoliga qaytishga tayyor bo‘lganida, harbiy aralashuvga hojat qolmasdi, deydi Fridrix Merts.
Germaniya kansleri “Eron rejimi” tugashini istaydi
Merts go‘yoki Eronda “terrorchi rejim” hukmronlik qilayotganini ma’lum qildi.
Uning oxiri kelsa yaxshi bo‘lardi, dedi Germaniya kansleri.
Isroilning Eron yadroviy va harbiy obyektlariga hujumlari boshlanganidan so‘ng, Merts Isroil o‘zini va fuqarolarini himoya qilish huquqiga ega ekanligini aytgandi. Uning so‘zlariga ko‘ra, Eron yadroviy dasturi “Yadro qurolini tarqatmaslik to‘g‘risidagi shartnoma qoidalarini buzadi va butun mintaqa, xususan, Isroil davlati uchun jiddiy xavf tug‘diradi”.
Kansler, shuningdek, har ikki tomonni mintaqada yanada beqarorlik va keskinlashuvga olib kelishi mumkin bo‘lgan qadamlardan tiyilishga chaqirgan.
Izoh (0)