O‘zbekistonda rasmiy tashrif bilan bo‘lib turgan BMT bosh kotibi Аntoniu Guterrish 1-iyul kuni Oliy Majlis Senatida bo‘lib, Tanzila Norboyeva bilan uchrashuv o‘tkazdi.
O‘zAning ma’lum qilishicha, suhbat chog‘ida O‘zbekiston tashabbuslarini xalqaro maydonda ilgari surish, mamlakatda amalga oshirilayotgan islohotlar hamda mintaqaviy hamkorlikni kengaytirishga doir aniq takliflarni qo‘llab-quvvatlashda BMT bilan konstruktiv hamkorlik yuzasidan fikr almashildi.
2017-yildan buyon O‘zbekiston tashabbusi bilan BMTning 10 ta rezolyutsiyasi qabul qilingani hamda O‘zbekiston BMT qo‘mitalari va boshqaruv organlari (Inson huquqlari bo‘yicha kengash, EKOSOS, Xalqaro mehnat tashkiloti va boshqalar)ga a’zo bo‘lganiga e’tibor qaratildi.
Аntoniu Guterrish O‘zbekistonda olib borilayotgan siyosiy, iqtisodiy, tashqi siyosatdagi ochiqlik, xususan, ijtimoiy himoya hamda gender tengligi masalalaridagi islohotlarni yuqori baholadi.
Shuningdek, O‘zbekistonning Markaziy Osiyo davlatlarini birlashtirish yo‘lidagi tashabbusi va saʼy-harakatlarini alohida eʼtirof etdi.
“Markaziy Osiyo sivilizatsiya markazi hisobalanadi, O‘zbekiston esa mintaqaning markazidir. O‘zbekiston BMTning ko‘plab sohalarida, xususan, BRMni amalga oshirishda yo‘lboshchi davlatlardan biri. O‘zbekiston bilan BMT hamkorligi alohida o‘rin va ahamiyat kasb etadi. Men Markaziy Osiyoga ilk bor tashrif buyurganimda, mintaqa tarqoq va yakkalanib qolgan edi. Endi prezident Shavkat Mirziyoyev tufayli mintaqa birlashdi. O‘zbekiston Respublikasi prezidentining oqilona siyosati tufayli Markaziy Osiyoning ko‘plab muammoli masalalari hal etildi”, — dedi BMT bosh kotibi.
Senat raisining bildirishicha, uchrashuv davomida ekologiya, iqlim o‘zgarishi, munosib mehnat tamoyillari, raqamli texnologiyalar va sunʼiy intellekt imkoniyatlaridan foydalanish masalalari yuzasidan ham fikr almashilgan.
Tashrif yakunida BMT bosh kotibi Senatning Faxriy mehmonlar kitobiga dastxat yozib qoldirdi.
Izoh (0)