Ўзбекистонда расмий ташриф билан бўлиб турган БМТ бош котиби Антониу Гутерриш 1 июль куни Олий Мажлис Сенатида бўлиб, Танзила Норбоева билан учрашув ўтказди.
ЎзАнинг маълум қилишича, суҳбат чоғида Ўзбекистон ташаббусларини халқаро майдонда илгари суриш, мамлакатда амалга оширилаётган ислоҳотлар ҳамда минтақавий ҳамкорликни кенгайтиришга доир аниқ таклифларни қўллаб-қувватлашда БМТ билан конструктив ҳамкорлик юзасидан фикр алмашилди.
2017 йилдан буён Ўзбекистон ташаббуси билан БМТнинг 10 та резолюцияси қабул қилингани ҳамда Ўзбекистон БМТ қўмиталари ва бошқарув органлари (Инсон ҳуқуқлари бўйича кенгаш, EKОSOS, Халқаро меҳнат ташкилоти ва бошқалар)га аъзо бўлганига эътибор қаратилди.
Антониу Гутерриш Ўзбекистонда олиб борилаётган сиёсий, иқтисодий, ташқи сиёсатдаги очиқлик, хусусан, ижтимоий ҳимоя ҳамда гендер тенглиги масалаларидаги ислоҳотларни юқори баҳолади.
Шунингдек, Ўзбекистоннинг Марказий Осиё давлатларини бирлаштириш йўлидаги ташаббуси ва саъй-ҳаракатларини алоҳида эътироф этди.
“Марказий Осиё цивилизация маркази ҳисобаланади, Ўзбекистон эса минтақанинг марказидир. Ўзбекистон БМТнинг кўплаб соҳаларида, хусусан, БРМни амалга оширишда йўлбошчи давлатлардан бири. Ўзбекистон билан БМТ ҳамкорлиги алоҳида ўрин ва аҳамият касб этади. Мен Марказий Осиёга илк бор ташриф буюрганимда, минтақа тарқоқ ва яккаланиб қолган эди. Энди президент Шавкат Мирзиёев туфайли минтақа бирлашди. Ўзбекистон Республикаси президентининг оқилона сиёсати туфайли Марказий Осиёнинг кўплаб муаммоли масалалари ҳал этилди”, — деди БМТ бош котиби.
Сенат раисининг билдиришича, учрашув давомида экология, иқлим ўзгариши, муносиб меҳнат тамойиллари, рақамли технологиялар ва сунъий интеллект имкониятларидан фойдаланиш масалалари юзасидан ҳам фикр алмашилган.
Ташриф якунида БМТ бош котиби Сенатнинг Фахрий меҳмонлар китобига дастхат ёзиб қолдирди.
Изоҳ (0)