O‘zbekiston prezidenti Shavkat Mirziyoyevning tug‘ilgan kuni munosabati bilan Vladimir Putin va Si Szinpin tabrik yo‘lladi.
Prezident matbuot kotibining xabar qilishicha, Rossiya prezidenti tabrik maktubida Shavkat Mirziyoyev rahbarligida O‘zbekiston ijtimoiy va iqtisodiy sohalarda salmoqli yutuqlarga erishganini, jahon maydonida o‘z mavqeyini mustahkamlaganini qayd etgan.
“Davlatlarimiz o‘rtasidagi strategik sheriklik va ittifoqchilik munosabatlari, barcha yo‘nalishlarda samarali ikki tomonlama hamkorlikni rivojlantirishga qo‘shgan shaxsiy hissangiz beqiyosdir.
Yaqinda Toshkentda o‘tgan samarali muzokaralarimizni iliq eslayman. Rossiya va O‘zbekistonning do‘st xalqlari farovonligi yo‘lida konstruktiv muloqotni va yaqin hamkorlikni davom ettirishdan mamnunman. Sizga chin dildan mustahkam sog‘lik, baxt-saodat, farovonlik va muvaffaqiyatlar tilayman”, deyiladi tabrikda.
Si Szinpin esa o‘z tabrigida Xitoy—O‘zbekiston munosabatlarini rivojlantirishga alohida e’tibor qaratishini va Shavkat Mirziyoyev bilan mustahkam do‘stligini qadrlashini ta’kidladi.
“Siz bilan birgalikda barcha sohalarda hamkorlikni rivojlantirish va Xitoy—O‘zbekiston munosabatlarini yangi bosqichga olib chiqish bo‘yicha sa’y-harakatlarga tayyorman”, deyiladi Xitoy raisi tabrigida.
Prezident matbuot kotibining xabar qilishicha, Shavkat Mirziyoyev tavallud kuni munosabati bilan xorijiy davlatlar, hukumatlar va parlamentlar, nufuzli xalqaro va mintaqaviy tashkilotlar rahbarlaridan qutlovlar kelishi davom etmoqda.
Izoh (0)