Oliy Majlis Qonunchilik palatasining majlisida bir guruh deputatlar tomonidan ishlab chiqilgan “O‘zbekiston Respublikasining ayrim qonun hujjatlariga maʼrifiy faoliyatni amalga oshirish tartibini belgilashga qaratilgan qo‘shimcha va o‘zgartirishlar kiritish to‘g‘risida”gi qonuni loyihasi birinchi o‘qishda konseptual jihatdan muhokama qilindi.
Qonun loyihasida Maʼmuriy javobgarlik to‘g‘risidagi kodeksi yangi 59-4-modda bilan to‘ldirilib, maʼrifiy faoliyatni bunday faoliyat bilan shug‘ullanish huquqiga ega bo‘lmagan shaxs tomonidan ko‘rsatish yoxud maʼrifiy faoliyatni amalga oshirish bo‘yicha qonunchilikda belgilangan cheklovlarga rioya etmaslik holatlari uchun javobgarlik belgilanmoqda.
Shuningdek, “Taʼlim to‘g‘risida”gi qonun 14-1-modda bilan to‘ldirilib, mazkur qo‘shimcha va o‘zgartirishlar orqali ushbu sohadagi faoliyatni amalga oshirish talablari belgilanmoqda. Jumladan:
- maʼrifiy faoliyat insonni shaxsiy, intellektual va maʼnaviy rivojlantirish, ijtimoiy va iqtisodiy faolligini oshirish, intellektual va ijodiy salohiyatini namoyon etish, individual salohiyati, imkoniyatlari, kommunikativ qobiliyatlarini yaxshilash uchun zarur ko‘nikma va malakani shakllantirishga qaratilgan hamda davlat taʼlim standartlari bilan qamrab olinmaydigan faoliyat turi hisoblanishi belgilanmoqda;
- maʼrifiy faoliyatni respublika ijro etuvchi hokimiyat organlari, mahalliy davlat hokimiyati organlari, fuqarolarning o‘zini o‘zi boshqarish organlari, jismoniy va yuridik shaxslar tomonidan qonunchilik hujjatlarida nazarda tutilgan talablarni hisobga olgan holda amalga oshirilishi mumkin ekanligi ko‘zda tutilmoqda;
- maʼrifiy faoliyatni amalga oshirishi taqiqlangan shaxslar doirasi belgilanmoqda;
- maʼrifiy faoliyatni amalga oshirish tartibi, shakllari, uni amalga oshirish talablari va shartlari O‘zbekiston Respublikasi Vazirlar Mahkamasi tomonidan belgilanishi nazarda tutilmoqda.
Deputatlarning taʼkidlashicha, qonun loyihasini qabul qilinishi bilan maʼrifiy faoliyatni amalga oshirish borasidagi tartibsizliklarga barham beriladi, noqonuniy maʼrifiy faoliyat bilan shug‘ullayotgan shaxslar uchun javobgarlik kuchaytiriladi.
Qonun loyihasi deputatlar tomonidan uchinchi o‘qishda qabul qilindi.
Izoh (0)