AQSH harbiylari Yaqin Sharqdagi bazalardan Eronning ehtimoliy hujumi sababli ba’zi samolyot va kemalarni ko‘chirdi. Bu haqda Arab News xabar berdi.
Bu ko‘chirish haqida AQSHning ikki rasmiyi 18-iyun kuni xabar bergan. Prezident Donald Tramp Qo‘shma Shtatlar Isroilning Eron yadroviy va raketa obyektlarini bombardimon qilishiga qo‘shilish-qo‘shilmasligiga butun dunyo qiziqish bildirmoqda.
AQSHning yuqori martabali amaldorlari yaqin kunlarda Eronga zarba berish ehtimoliga tayyorgarlik ko‘rayotgani aytilgan. Vaziyat hali ham rivojlanayotgani va o‘zgarishi mumkinligi ham qayd etilgan.
Tramp Isroilga qo‘shilish yoki qo‘shilmaslik bo‘yicha biror qarorga kelgan-kelmaganini aytishdan bosh tortib bunday dedi: “Qo‘limdan keladi. Men bunday qilishim ham qilmasligim ham mumkin. Aytmoqchimanki, nima qilishimni hech kim bilmaydi”.
Bundan tashqari, AQSHning Qatardagi elchixonasi 19-iyun kuni o‘z xodimlariga Doha tashqarisidagi cho‘lda joylashgan AQSHning Yaqin Sharqdagi eng yirik harbiy inshooti — Al-Udeid aviabazasiga kirishni vaqtincha cheklash haqida ogohlantirish e’lon qilgan. Elchixona Qatardagi xodimlar va AQSH fuqarolariga “ehtiyotkorlik va davom etayotgan mintaqaviy jangovar harakatlar nuqtai nazaridan” hushyorlikni oshirishni aytgan.
Eron Vashingtonga agar Qo‘shma Shtatlar Isroilning harbiy harakatlariga bevosita aralashsa, qat’iy javob berishini ma’lum qilgan. Bu haqda 18-iyun kuni Eronning Jenevadagi Birlashgan Millatlar Tashkilotidagi elchisi ma’lum qilgan.
Izoh (0)