“Toshkent-Aero” ixtisoslashtirilgan bojxona kompleksi xodimlari tomonidan Islom Karimov nomidagi Toshkent xalqaro aeroporti chegara-bojxona postida 100 million so‘mlik ichimliklarni olib o‘tishga urinish, noqonuniy olib o‘tilayotgan 90 million so‘mlik braslet va 120 million so‘mlik zargarlik buyumlari to‘xtatib qolindi. Bu haqda “Daryo”ga “Toshkent-Aero” ixtisoslashtirilgan bojxona kompleksi axborot xizmati xabar berdi.
2024-yilning 26-iyul kuni soat 19:30 larda bojxona xodimlari Istanbul—Toshkent yo‘nalishi bo‘yicha uchib kelgan O‘zbekiston Respublikasi fuqarosini shaxsiy ko‘rikdan o‘tkazdi. Unda fuqaroning qo‘liga taqilgan, bojxona nazoratiga belgilangan tartibda taqdim etilmagan, og‘zaki so‘rovda ma’lum qilinmagan, olib kirish me’yoridan ortiq bo‘lgan, qiymati 119 million 391 ming so‘mlik 61 gramm zargarlik buyumlari borligi aniqlandi, deydi bojxona axborot xizmati mas’uli.
Shuningdek, ushbu manzilda noqonuniy tarzda yoshartiruvchi ichimliklar olib o‘tmoqchi bo‘lgan shaxs ham to‘xtatib qolingan. Uning taxminiy qiymati 100 mln so‘m bo‘lgan.
Bildirilishicha, 28-iyul kuni soat 20:30 larda Toshkent xalqaro aeroporti chegara-bojxona posti xodimlari tomonidan Pekin—Toshkent yo‘nalishi bo‘yicha uchib kelgan xorij fuqarosining qo‘l yuklari va bagajlari tekshirilganida sifati kafolatlanmagan, taxminiy narxi 100 million 922 ming so‘m bo‘lgan kollagen ichimliklari borligi aniqlangan.
29-iyul kuni Toshkent xalqaro aeroporti chegara-bojxona posti xodimlari Dubay—Toshkent yo‘nalishi bo‘yicha uchib kelgan, O‘zbekiston Respublikasi fuqarosiga tegishli bir dona sariq rangli qo‘l sumkasini tekshirganda bojxona nazoratiga belgilangan tartibda taqdim etilmagan, og‘zaki so‘rovda ma’lum qilinmagan, olib kirish me’yoridan ortiq bo‘lgan qiymati 90 million so‘mlik jami 1 dona oq rangli metalldan yasalgan 750 probali braslet borligi aniqlandi. Hozirda har uchala holat yuzasidan surishtiruv harakatlari olib borilmoqda, deydi “Toshkent-Aero” ixtisoslashtirilgan bojxona kompleksi axborot xizmati xodimi Go‘zaloy Abdullayeva.
Izoh (0)