Shimoliy Koreya tarixda birinchi marta o‘zining plyaj kurortini ochadi. Mamlakat rahbari Kim Chen In turizmni rivojlantirayotgani ma’lum qilindi. Bu haqda BBC xabar berdi.
“Wonsan Kalma” nomli kurort Shimoliy Koreyaning sharqiy sohilida qurib bitkazilgan. U 1-iyul kuni mahalliy sayyohlar uchun ochilishi rejalashtirilgan. Xorijlik turistlarga qachon ruxsat berilishi esa hali noma’lum.
Kim Chen Inning yoshlik davrlari kurort joylashgan Vonsan hududida o‘tgan. U yerda mamlakatning ko‘plab elitalari shaxsiy villalarga ega. Vonsan bir vaqtlar raketa poligoni joylashgan shahar edi. Mamlakat rahbari hozirda hududni o‘zgartirishga harakat qilmoqda.
Dam olish maskani 20 000 kishi tashrif buyurishiga mo‘ljallangan. Kurort plyajning 4 kilometr hududini egallab, o‘z ichiga mehmonxona, restoran, savdo markazlari va akvaparklarni oladi. U dastlab 2019-yil oktyabr oyida ochilishi kerak edi, ammo Covid pandemiyasida qurilish ishlari kechiktirilgan.
O‘nlab yillar davomida yadroviy qurol dasturi uchun qattiq sanksiyalarga uchragan Shimoliy Koreya dunyodagi eng qashshoq davlatlar qatoriga kiradi. Pxenyan o‘z resurslarining katta qismini 1948-yildan beri mamlakatni boshqarayotgan Kim oilasi, armiya hamda diqqatga sazovor joylarga yo‘naltirmoqda.
Turizm Pxenyan uchun iqtisodiy foyda olishning oson yo‘li hisoblanadi. Xorijiy sayyohlar mamlakatga kiritilayotgan bo‘lsa-da, turistik guruhlar asosan mamlakatning “do‘stlari” bo‘lgan Xitoy va Rossiyadan keladi.
“Men bu xalqaro turizmning kengroq ochilishiga ishora ekaniga umid qilgandim. Ammo afsuski, hozircha bunday emasga o‘xshaydi”, deydi Young Pioneer Tours asoschilaridan biri Rouen Beard.
Mamlakat xorijiy turizmi Covid pandemiyasi paytida inqirozga uchragan. Shimoliy Koreya 2020-yil boshida o‘z chegaralarini yopgan. Cheklovlar 2023-yil o‘rtalaridan kamaytirilib, bir yildan so‘ng rossiyalik mehmonlar mamlakatga kiritila boshlangan.
Pxenyan fevral oyida Buyuk Britaniya, Fransiya, Germaniya va Avstraliyadan sayyohlarni qabul qilgan. Ular Xitoy chegarasi orqali mamlakatga kirgandi. Bir necha haftadan so‘ng mamlakat turizmni to‘satdan to‘xtatgan va buning sababini ochiqlamagan.
Izoh (0)