Eron oliy rahnamosi Oyatulloh Ali Xomanaiy AQSH Eronni o‘ziga bo‘ysundirishni istayotganini ta’kidlab, eronliklar bunday og‘ir haqoratga qarshi bor kuchi bilan qarshilik ko‘rsatishini ma’lum qildi. Bu haqda Al Jazeera xabar berdi.
Ali Xomanaiyning tegishli bayonoti haqida davlat televideniyesi 24-avgust kuni xabar bergan.
“AQSH Eronni mamlakatga bo‘ysunishini xohlaydi. Ammo eronliklar bunday haqoratga bor kuchi bilan qarshilik ko‘rsatadi. Bizdan AQSHga qarshi salbiy fikrlar bildirmaslikni va ular bilan to‘g‘ridan to‘g‘ri muzokara qilishni talab qilayotganlar vaziyatga yuzaki munosabat bildirmoqda. Bu muammoni hal etib bo‘lmaydi”, dedi Xomanaiy diniy tadbirlardan birida.
Xomanaiyning ushbu bayonoti Eron va Yevropa davlatlari 22-avgust kuni yadro dasturi yuzasidan to‘xtab qolgan muzokaralarni qayta boshlashga kelishib olganidan so‘ng yangragan. Fransiya, Germaniya va Buyuk Britaniya Tehron muzokaralarga qaytmasa, BMT sanksiyalarini tezkor ravishda tiklashga tayyorligini bildirgan.
Ma’lumot uchun, Tehron Eron-Isroil o‘rtasida bo‘lib o‘tgan 12 kunlik urushda mamlakatning yadro obyektlariga uyushtirilgan hujumlardan so‘ng, AQSH bilan yadro muzokaralarini to‘xtatib qo‘ygan edi.
“Dushman uchun oldinga yo‘l — Eronda ixtilof vujudga keltirish. Amerikalik agentlar va sionistik rejim bu ishda aybdor sanaladi”, dedi oliy rahnamo.
G‘arb davlatlari, jumladan AQSH, Eronni yadroviy qurol yaratishga urinayotganlikda ayblamoqda. Biroq Tehron bu dastur faqat tinch maqsadlarda olib borilayotganini ta’kidlab keladi.
Ma’lumot o‘rnida, Eron 2015-yilda AQSH va bir qator Yevropa davlatlari bilan yirik yadroviy bitim imzolagan edi. Unga ko‘ra, Eron o‘z yadroviy faoliyatini cheklash evaziga xalqaro sanksiyalardan xalos bo‘lishi lozim edi. Ammo Qo‘shma Shtatlar prezidenti Donald Tramp 2018-yilda ushbu bitimdan chiqib, Tehronga yangi sanksiyalar joriy qilgan edi. Eron va AQSH o‘rtasida 2025-yilning iyun oyida bo‘lishi kerak bo‘lgan oltinchi raund yadro muzokaralari aynan yuqoridagi 12 kunlik urush tufayli bekor bo‘lgan.
Izoh (0)