Microsoft kompaniyasining sun’iy intellekt bo‘limi rahbari Mustafo Sulaymon kun sayin ko‘proq insonlar “sun’iy intellekt psixozi”ga chalinayotgani haqida ogohlantirdi. Bunday xavotirli holat haqida The Times xabar berdi.
Sun’iy intellektga bo‘lgan nosog‘lom qiziqish va qaramlik tobora ortib bormoqda. Bunday odatga berilgan odamlar SIni ongli mavjudot sifatida ko‘ra boshlaydi, u bilan go‘yoki romantik aloqada ekaniga ishonadi va natijada gallyutsinatsiyalar ham kuzatiladi.
Bunday xavf nafaqat ruhiy muammolari bor kishilar, balki ruhiyati barqaror bo‘lgan shaxslarga ham ta’sir qilishi mumkin.
“Qanchalik og‘ir eshitilmasin, ushbu muammo tez orada global tus oladi va ruhiy kasallikka moyil odamlar ham, sog‘lom shaxslar ham uning ta’siri ostiga tushadi”, deydi mutaxassis.
“Sun’iy intellekt psixozi” umumiy qabul qilingan tibbiy atama emas, biroq u tobora ko‘proq ChatGPT yoki Grok kabi chat-bot foydalanuvchilarni muloqot vaqtida real hayotdan uzilib qolishiga sababchi bo‘lmoqda.
Tibbiy vizualizatsiya mutaxassisi Syuzan Shelmerdin esa kelajakda shifokorlar bemorlardan, xuddi chekish yoki spirtli ichimlik iste’moli odatlari haqida so‘raganidek, “sun’iy intellektdan qanchalik tez-tez foydalanasiz?” deb ham so‘ray boshlashlari mumkinligini taxmin qilmoqda.
Izoh (0)