Hindiston 5 ming kilometrdan ortiq masofaga uchuvchi va yadroviy jangovar kallaklarni tashishga qodir “Agni-5” ballistik raketasini muvaffaqiyatli sinovdan o‘tkazdi. Bu haqda CNN xabar berdi.
Hindiston Mudofaa vazirligi 20-avgust kuni ushbu mavzu yuzasidan rasmiy bayonot bergan. Ma’lum qilinishicha, sinov Odisha shtatida o‘tkazilgan bo‘lib, raketa barcha texnik va operatsion talablarga to‘liq javob bergan. “Agni-5” raketasining uchish masofasi 5 000 kilometrdan ortiq bo‘lib, bu orqali Hindiston o‘zining asosiy geosiyosiy raqiblari — Xitoy va Pokiston hududlariga oson yetib bora oladi.
Raketa sinovi Hindiston bosh vaziri Narendra Modining so‘nggi yillarda ilk bor Xitoyga tashrif buyurishga tayyorlanayotgan bir paytda bo‘lib o‘tmoqda. Ushbu tashrif Shanxay hamkorlik tashkiloti sammiti doirasida avgust oxirida Xitoyning Tyanszin shahrida bo‘lib o‘tishi rejalashtirilgan.
Xitoy tashqi ishlar vaziri Van I iyul oyida Nyu Dehliga tashrif buyurgandi. Shuningdek, avvalroq Modi va Si Szinpin 2024-yil oktyabr oyida Rossiyada bo‘lib o‘tgan BRICS sammitida norasmiy uchrashuv o‘tkazgandi. Ushbu ijobiy siljishlar orasida ikki davlat orasida 2020-yilda COVID pandemiyasi sabab bekor qilingan to‘g‘ridan to‘g‘ri tijoriy aviaqatnovlarning qayta tiklanishi, hind sayyohlariga Tibetdagi ziyorat joylari ochilishi va turist vizalarining qayta berilishi bor.
“Hindiston va Xitoy o‘rtasida barqaror, oldindan aytib bo‘ladigan va konstruktiv munosabatlar nafaqat mintaqaviy, balki global tinchlik va farovonlik uchun ham muhim”, dedi Modi Xitoy TIV bilan uchrashuvdan so‘ng.
Yadro qurollanish poygasi: Hindiston ortda qolmoqda
Shvetsiyaning SIPRI institutiga ko‘ra, bugungi kunga kelib Xitoyda taxminan 600 ta, Hindistonda esa 180 ta yadro kallagi mavjud. Mutaxassislar Dehli harbiy qudratda Pekindan ortda qolayotganini va aynan shu sababli bu kabi qurol sinovlari faol olib borilayotganini ta’kidlamoqda.
AQSH bilan munosabatlarda taranglik
Hindistonning Rossiyadan neft xarid qilayotgani Vashington bilan munosabatlarda keskinlik keltirib chiqarmoqda. Xususan, AQSH prezidenti Donald Tramp Dehlidan keladigan mahsulotlarga 50 foizlik boj bilan tahdid qilgan edi. Tahlilchilarga ko‘ra, AQSHning bu kabi iqtisodiy siyosati Xitoyga qarshi geosiyosiy ittifoqdosh sifatida ko‘rilayotgan Hindistonni Xitoyga yaqinlashtirishi mumkin.
Pokiston bilan keskinlik va SHHTdagi muhim uchrashuvlar
“Agni-5” raketasi Hindistonning yadro quroliga ega boshqa qo‘shnisi — Pokistonga qarshi mudofaa strategiyasining ham muhim qismi sanaladi. Ikki davlat o‘rtasida 2025-yil bahorida so‘nggi o‘n yillikdagi eng keskin harbiy to‘qnashuvlardan biri sodir bo‘lgan, ya’ni ikki tomon bir-birining hududiga raketalar bilan zarba bergan.
SHHT sammitida Pokiston bosh vaziri Shahboz Sharif ham ishtirok etishi kutilmoqda. Pokiston so‘nggi yillarda Xitoy bilan aloqalarni keskin mustahkamlab, Si Szinpinning “Bir makon — bir yo‘l” tashabbusining faol ishtirokchisiga aylangan. SIPRI ma’lumotlariga ko‘ra, Pokiston qurol importining 81 foizi Xitoydan amalga oshirilmoqda.
Izoh (0)