Ҳиндистон 5 минг километрдан ортиқ масофага учувчи ва ядровий жанговар каллакларни ташишга қодир “Агни-5” баллистик ракетасини муваффақиятли синовдан ўтказди. Бу ҳақда CNN хабар берди.
Ҳиндистон Мудофаа вазирлиги 20 август куни ушбу мавзу юзасидан расмий баёнот берган. Маълум қилинишича, синов Одиша штатида ўтказилган бўлиб, ракета барча техник ва операцион талабларга тўлиқ жавоб берган. “Агни-5” ракетасининг учиш масофаси 5 000 километрдан ортиқ бўлиб, бу орқали Ҳиндистон ўзининг асосий геосиёсий рақиблари — Хитой ва Покистон ҳудудларига осон етиб бора олади.
Ракета синови Ҳиндистон бош вазири Нарендра Модининг сўнгги йилларда илк бор Хитойга ташриф буюришга тайёрланаётган бир пайтда бўлиб ўтмоқда. Ушбу ташриф Шанхай ҳамкорлик ташкилоти саммити доирасида август охирида Хитойнинг Тянсзин шаҳрида бўлиб ўтиши режалаштирилган.
Хитой ташқи ишлар вазири Ван И июль ойида Нью Деҳлига ташриф буюрганди. Шунингдек, аввалроқ Моди ва Си Цзиньпин 2024 йил октябрь ойида Россияда бўлиб ўтган BRICS саммитида норасмий учрашув ўтказганди. Ушбу ижобий силжишлар орасида икки давлат орасида 2020 йилда COVID пандемияси сабаб бекор қилинган тўғридан тўғри тижорий авиақатновларнинг қайта тикланиши, ҳинд сайёҳларига Тибетдаги зиёрат жойлари очилиши ва турист визаларининг қайта берилиши бор.
“Ҳиндистон ва Хитой ўртасида барқарор, олдиндан айтиб бўладиган ва конструктив муносабатлар нафақат минтақавий, балки глобал тинчлик ва фаровонлик учун ҳам муҳим”, деди Моди Хитой ТИВ билан учрашувдан сўнг.
Ядро қуролланиш пойгаси: Ҳиндистон ортда қолмоқда
Швециянинг SIPRI институтига кўра, бугунги кунга келиб Хитойда тахминан 600 та, Ҳиндистонда эса 180 та ядро каллаги мавжуд. Мутахассислар Деҳли ҳарбий қудратда Пекиндан ортда қолаётганини ва айнан шу сабабли бу каби қурол синовлари фаол олиб борилаётганини таъкидламоқда.
АҚШ билан муносабатларда таранглик
Ҳиндистоннинг Россиядан нефть харид қилаётгани Вашингтон билан муносабатларда кескинлик келтириб чиқармоқда. Хусусан, АҚШ президенти Дональд Трамп Деҳлидан келадиган маҳсулотларга 50 фоизлик бож билан таҳдид қилган эди. Таҳлилчиларга кўра, АҚШнинг бу каби иқтисодий сиёсати Хитойга қарши геосиёсий иттифоқдош сифатида кўрилаётган Ҳиндистонни Хитойга яқинлаштириши мумкин.
Покистон билан кескинлик ва ШҲТдаги муҳим учрашувлар
“Агни-5” ракетаси Ҳиндистоннинг ядро қуролига эга бошқа қўшниси — Покистонга қарши мудофаа стратегиясининг ҳам муҳим қисми саналади. Икки давлат ўртасида 2025 йил баҳорида сўнгги ўн йилликдаги энг кескин ҳарбий тўқнашувлардан бири содир бўлган, яъни икки томон бир-бирининг ҳудудига ракеталар билан зарба берган.
ШҲТ саммитида Покистон бош вазири Шаҳбоз Шариф ҳам иштирок этиши кутилмоқда. Покистон сўнгги йилларда Хитой билан алоқаларни кескин мустаҳкамлаб, Си Цзиньпиннинг “Бир макон — бир йўл” ташаббусининг фаол иштирокчисига айланган. SIPRI маълумотларига кўра, Покистон қурол импортининг 81 фоизи Хитойдан амалга оширилмоқда.
Изоҳ (0)