Fransiya prezidenti Emmanuel Makron Yevropa davlatlari Ukraina mojarosini hal qilish jarayonida faol ishtirok etishi kerakligini ta’kidladi. Bu haqda RBC xabar berdi.
Makronning tegishli bayonoti u Buyuk Britaniya bosh vaziri Kir Starmer, Germaniya kansleri Fridrix Mers va Ukraina prezidenti Vladimir Zelenskiy bilan telefon orqali muloqotdan so‘ng e’lon qilingan.
“Ukrainaning kelajagi ukrainaliklarsiz hal etilishi mumkin emas. Bu masalada yevropaliklar ham ishtirok etishi shart, chunki gap ularning xavfsizligi haqida ketmoqda”, deb yozdi Makron o‘zining X sahifasida.
Unga ko‘ra, Parij, Berlin va London Ukrainani qo‘llab-quvvatlashda davom etadi va bu boradagi harakatlar “istak bildirgan davlatlar koalitsiyasi” doirasida olib boriladi.
Tramp va Putin 15-avgust kuni uchrashadi
Ma’lum bo‘lishicha, AQSH prezidenti Donald Tramp va Rossiya prezidenti Vladimir Putin 15-avgust kuni Alyaskada uchrashadi. Rossiya prezidentining yordamchisi Yuriy Ushakovning aytishicha, ikki rahbar Ukrainadagi urushni tinch yo‘l bilan hal qilish bo‘yicha uzoq muddatli rejalarni muhokama qiladi.
NATO davlatlari Trampdan xavotirda
Axios nashrining yozishicha, ushbu uchrashuv oldidan AQSH, Ukraina va Yevropaning bir qancha yetakchi rasmiylari shu haftaning oxirida Britaniyada yig‘ilib, umumiy pozitsiyani kelishib olishga harakat qilmoqda. Nashr manbalariga ko‘ra, Kiyev va ba’zi NATO ittifoqchilari Tramp Putinning o‘t ochishni to‘xtatish va hududlarni almashtirish bo‘yicha taklifiga bir tomonlama rozi bo‘lishidan xavotirda. Ular Tramp Yevropa tomonining fikrini inobatga olmaydi, deb hisoblamoqda.
Izoh (0)