Apple kompaniyasi AQSHdagi investitsiyalarini yana 100 milliard dollarga oshirishini e’lon qildi. Bunga Donald Trampning kompaniyaga bosim o‘tkazgani sabab qilib ko‘rsatilmoqda. Bu haqda BBC xabar berdi.
Oq uyga ko‘ra, yangi sarmoya mahalliy ishlab chiqarishni kengaytirish, xususan, Apple mahsulotlari uchun ehtiyot qismlarini AQSHda ishlab chiqarishga turtki bo‘ladi. Sarmoya Apple’ning ilgari va’da qilgan 500 milliard dollarlik 4 yillik investitsiyasiga qo‘shimcha bo‘lishi aytilgan.
Tramp va Tim Kuk Oq uyda 6-avgust kuni o‘tkazilgan rasmiy marosimda birgalikda chiqish qilgan. AQSH prezidentiga ko‘ra, yangi sarmoya doirasida Apple Qo‘shma Shtatlardagi yetkazib beruvchilar bilan hamkorlikni kengaytiradi, mamlakat bo‘ylab yangi ma’lumot markazlari quradi. Kentukki shtatida esa iPhone hamda aqlli soatlar uchun “aqlli oynalar” ishlab chiqarish yo‘lga qo‘yiladi.
AQSH rahbari bu qarorni olqishlab, kompaniya ushbu rejalar tufayli 100 foizlik boj stavkasidan qutulib qolganini bildirgan. Shu bilan birga, u boshqa korxonalar ham mamlakat iqtisodiga sarmoya kiritsa, soliqlardan ozod bo‘lishi mumkinligini, ta’kidlagan.
Tim Kuk bu orada Apple’ning oldingi kiritgan 500 milliard dollarlik investitsiyasi allaqachon natija berayotganini aytgan. Uning so‘zlariga ko‘ra, yangi investitsiya Apple mahsulotlarida ishlatiladigan muhim komponentlarni aynan Qo‘shma Shtatlarda ishlab chiqarishga xizmat qiladi. U, shuningdek, Trampga Oval ofisda o‘z qo‘li bilan yaratgan shisha haykalchani tuhfa qilgan.
Tramp ilgari Apple’ni bevosita tilga olib, agar iPhone telefonlarini ishlab chiqarish AQSHga ko‘chirilmasa, kompaniya mahsulotlariga boj stavkalari oshirilishini aytgandi. Apple rahbari Tim Kuk o‘tgan hafta ushbu majburiyatlarni tilga olib, kompaniya bu borada yanada ko‘proq rejalar tuzayotganini ma’lum qilgan. Ayni paytda, Apple’ning aksiyalari investitsiya xabari ortidan 5 foizdan ko‘proqqa oshgani qayd etilgan. Oq uy bu voqeani Tramp siyosatining yutug‘i deb atamoqda:
“Bugungi e’lon — ishlab chiqarish sanoatimizdagi navbatdagi g‘alaba. U AQSH iqtisodiyoti va milliy xavfsizligini himoya qilishga xizmat qiladi”.
Apple Tramp prezidentlikka qaytganidan beri yangi tarif siyosati sabab ta’minot zanjiri tizimini qayta ko‘rib chiqmoqda. Kompaniya mahsulotlarini Xitoy o‘rniga Hindiston va Vyetnam orqali yetkazib bermoqda. Shunga qaramay, kompaniya iyun oyigacha bo‘lgan 3 oy ichida savdo tariflari sababli mamlakatga 800 million dollardan ortiq boj to‘lagan.
Izoh (0)