AQSH prezidenti Donald Tramp 2028-yil noyabrida bo‘lib o‘tadigan davlat rahbari saylovlarida vitse-prezident Jey Di Vensni o‘zining ehtimoliy vorisi deb atadi. Bu haqda u Oq uyda jurnalistlar bilan suhbatlashayotganda ma’lum qildi.
“Albatta, bu haqda gapirishga hali erta, lekin u ajoyib ish qilmoqda va hozircha eng kuchli nomzod bo‘lishi mumkin”, dedi u jurnalistlarga.
Tramp davlat kotibi Marko Rubioning Vensni 2028-yilgi saylovlarda “a’lo” nomzod deb aytgan so‘zlariga munosabat bildirishni so‘rashganida shunday javob bergan. Tramp Rubioning “qaysidir tarzda Jey Di bilan hamkorlik qilishi mumkinligini” e’tirof etgan.
2016-yilda Rubio Florida shtatidan respublikachi senator sifatida prezidentlikka nomzodini qo‘ygan edi. The Hill nashrining yozishicha, u yana saylovlarda ishtirok etishini istisno qilmayapti, biroq Trampning prezidentlik muddati oxirigacha davlat kotibi lavozimida qolmoqchi. Bu uning 2028-yilda nomzodini qo‘yishiga to‘sqinlik qilishi mumkin.
Vens faoliyatini AQSH dengiz piyodalari korpusiga xizmatidan boshlagan. 2005-yilda Iroqqa harbiy muxbir sifatida yuborilgan. U yerda jamoatchilik bilan aloqalar bo‘limida xizmat qilgan. Qo‘shma Shtatlarga qaytgach, Yel huquq maktabini tamomladi, venchur kapitalisti Piter Tilda ishladi va 2017-yilda o‘z firmasini tashkil etdi.
2016-yilda Vens Trampni keskin tanqid qilgan, uni ahmoq deb atagan va Gitlerga o‘xshatgan edi, ammo keyinchalik uning qarashlari o‘zgargan. 2022-yil noyabr oyida Tramp tomonidan qo‘llab-quvvatlangan Vens senat saylovlarida demokrat Tim Rayandan ustidan g‘alaba qozondi.
Shu paytgacha Tramp o‘zining ehtimoliy vorisi nomini aytishdan tiyilib kelgandi. U fevral oyidayoq Vensni “juda iqtidorli” deb ta’riflagan bo‘lsa-da, uni nomzod sifatida ko‘rsatishdan o‘zini tutgan edi.
Shunday qilib, Trampning uchinchi muddatga saylanishga urinish imkoniyati ochiqchasiga rad etilayotganga o‘xshaydi (buning uchun AQSH Konstitutsiyasiga o‘zgartirish kiritish kerak bo‘lardi).
Izoh (0)