Polsha bosh vaziri Donald Task navbatdagi hukumat yig‘ilishida mamlakatda so‘nggi oylarda sabotaj va yong‘in hodisalarida ishtirok etgan 32 nafar shaxs qo‘lga olinganini ma’lum qildi. Ular Rossiya manfaatlari uchun ishlagani aytilmoqda. Bu haqda Anadolu xabar berdi.
“Biz Rossiya maxsus xizmat kuchlari bilan hamkorlikda bo‘lgan, ularga sabotaj va hujumlar uyushtirish topshirig‘i berilgan 32 kishini hibsga oldik,” dedi Task Varshavadagi yig‘ilishda.
Uning aytishicha, Rossiya Ukrainani qo‘llab-quvvatlayotgan davlatlarni beqarorlashtirish maqsadida Polshani ushbu “gibrid urushi”ning nishoniga aylantirgan. Bu urush doirasida Belarusda migrantlar orqali yong‘in, kiberhujum va ijtimoiy tarmoqlarda yolg‘on axborot tarqatish ishlari olib borilmoqda.
Ukraina armiyasi rasmiysi ham 22-iyul kuni Yevropa Ittifoqi va Polshani Rossiyaning ehtimoliy agressiyasiga qarshi fuqarolar va harbiylarni tayyorlashga chaqirgan. Chunki “gibrid urush allaqachon boshlangani” aytilmoqda.
Polsha, AQSH va Germaniya razvedkalari esa Rossiya va Xitoy 2027-yilgacha “tajovuzkor harakatlar”ga tayyor bo‘lishi mumkinligi haqida ogohlantirgan. Polsha maxsus xizmatlar koordinatori Yatsek Dobjinskiyning ma’lum qilishicha, kolumbiyalik shaxs 2024-yili Varshava va Radom shaharlarida ikki bor yong‘in uyushtirishda gumon qilinmoqda.
27 yoshli bu gumonlanuvchi Rossiya razvedkasi topshirig‘i bilan harakat qilgani aytilmoqda. Polshaning Ichki xavfsizlik agentligi uni chet el razvedkasi foydasiga harakat qilishda ayblab, jinoiy ish ochgan.
Dobjinskiyga ko‘ra, ushbu shaxs ilgari Chexiyada terrorizmda ayblanib, 8 yilga qamalgan. Endi esa u Polshada yana 10 yilgacha ozodlikdan mahrum etilishi mumkin. Hozirda tergov ostida bo‘lganlar orasida polshalik, rossiyalik, ukrainaliklar va belaruslar bor.
U, shuningdek, Rossiyaning sabotaj harakatlariga aloqador asosiy shaxs xorijda qo‘lga olinib, diplomatik sa’y-harakatlar bilan Polshaga olib kelinganini ta’kidlagan.
“Sabotaj va hujumlar ortidagi shaxslarni aniqlashda samarali harakat qilmoqdamiz. Ammo real xavfsizlik ogohlantiruvini e’lon qilish vaqti keldi deb o‘ylayman”, dedi Task.
Shuningdek, u siyosiy doiralar orasida ham Rossiya bilan bilvosita yoki bevosita hamkorlik qilayotganlar borligidan ogohlantirib, shunday degan:
“Kimki Polsha davlatining tinchligiga rahna solsa, u bevosita yoki bilvosita Rossiya xizmatlariga xizmat qilmoqda. Biz bundaylarga achinib o‘tirmaymiz”.
Izoh (0)