Turkiyaning mudofaa va texnologiya sohasidagi eng yuqori martabali amaldorlari mamlakat 2 ming km masofaga uchib bora oladigan raketa dasturi ustida ishlayotganini rasman ma’lum qildi. Mazkur qadam Anqaraning mintaqaviy harbiy kuch sifatidagi mavqeini mustahkamlash yo‘lida yangi bosqich hisoblanadi.
“Biz Turkiyaning 2 ming km raketa dasturi borligini rasman e’lon qildik. Eng ilg‘or texnologiyalarga milliy darajada erishdik. Turkiya o‘yin qoidalarini o‘zgartiradigan payt keldi”, degan Sanoat va texnologiyalar vaziri Mehmet Fatih Kachir.
Uning so‘zlariga ko‘ra, Turkiya raketasozlik texnologiyalari borasida ancha ildamlab, mazkur tarmoqni juda yuqori darajada rivojlantirgan. Uning ushbu bayonotdan oldin prezident Rajab Toyyib Erdo‘g‘on ham raketa ishlab chiqarish salohiyatini rivojlantirish rejalari borligini tasdiqlagan edi.
“Yaqin orada hech kim qarshi chiqishga jur’at qilmaydigan mudofaa quvvatiga ega bo‘lamiz”, degan edi u iyundagi nutqida.
Strategik maqsad
Turklar e’lon qilgan 2 ming km jangovar radiusga ega raketa loyihasi nazariy jihatdan mamlakatga Markaziy Yevropa, Shimoliy Afrika va Yaqin Sharqning katta qismini nishonga olish imkonini beradi. Hozircha texnik tafsilotlar oshkor etilmagan. Biroq ekspertlar mazkur tizim Som va Tayfun dasturlari asosida ishlab chiqilishini taxmin qilmoqda.
Istanbulda boshlangan IDEF-2025 forumida mamlakat o‘zining ilk gipertovushli raketasini namoyish qildi. Uning nomi Tayfun Block-4 bo‘lib, vazni 7,2 tonnani tashkil etadi. Raketa 800-1000 km jangovar radiusga egaligi taxmin qilinmoqda.
So‘nggi yillarda Turkiya milliy mudofaa sanoatida sezilar yutuqlarga erishdi. Mamlakatning Roketsan, TAI va Aselsan kabi kompaniyalari qisqa masofali qurollardan tortib uzoq masofali havo mudofaa tizimlari va qanotli raketalargacha bo‘lgan keng spektorlari qurol-yarog‘larni ishlab chiqarishni yo‘lga qo‘ydi. Baykar Makina shirkatining Bayraktar TB2 va Akinci kabi dronlari esa allaqachon xalqaro arenada shuhrat qozondi.
Izoh (0)