“Tadbirkorlikni rivojlantirish kompaniyasi” AJ 14-iyul kuni Yevropaning yetakchi auditorlik tashkilotlaridan biri — Astraia Certification tomonidan o‘tkazilgan mustaqil audit natijalariga ko‘ra, ISO 9001:2015 (sifat menejmenti tizimi) va ISO 37001:2016 (korrupsiyaga qarshi boshqaruv tizimi) xalqaro standartlariga muvofiqlik sertifikatlariga ega bo‘ldi.
Audit davomida kompaniyaning boshqaruv tizimi, mijozlar bilan ishlash tartibi, risklarni boshqarish bo‘yicha amaliyotlari hamda korrupsiyaga qarshi kurashish tizimi batafsil o‘rganildi. Tekshiruv yakunlari ushbu yo‘nalishlarda joriy etilgan amaliyotlar xalqaro talablar darajasida ekanini tasdiqladi.
Kompaniya vakillarining so‘zlariga ko‘ra, ushbu sertifikatlar mijozlar, hamkorlar va investorlar ishonchini oshirishga xizmat qiluvchi muhim bosqich bo‘lib, tashkilotning sifat va halollikka bo‘lgan yondashuvini mustahkamlaydi.
ISO 9001:2015 Kompaniyada sifatni boshqarishga tizimli yondashuv joriy etilgani, xalqaro standartlarga mos keladigan ichki jarayonlarning shaffofligi va samaradorligi ta’minlanganini tasdiqlaydi. Bu esa Kompaniya xizmatlarining doimiy takomillashib borishi va mijozlar ehtiyojlariga mos ravishda tashkil etilishini kafolatlaydi.
ISO 37001:2016 sertifikati esa Kompaniyada korrupsiyaga qarshi siyosat ishlab chiqilgani, uni amalda qo‘llash va xatarlarni oldini olish bo‘yicha samarali mexanizmlar joriy etilganini ko‘rsatadi.
“Tadbirkorlikni rivojlantirish kompaniyasi” AJ rahbariyati va jamoasi xalqaro va milliy standartlarga mos faoliyat yuritish orqali ichki jarayonlarni yanada takomillashtirish, xizmatlar sifatini oshirish va jamoatchilik ishonchini mustahkamlashda davom etadi.
Reklama huquqi asosida.
Izoh (0)