AQSH prezidenti Donald Tramp 1-avgustdan boshlab Kanadadan kirib keladigan tovarlarga 35 foizlik boj joriy etishini ma’lum qildi. Bu haqda BBC xabar berdi.
Ikki davlat oldinroq savdo bo‘yicha yangi kelishuvga erishish uchun shu yaqin kunlarga muddat belgilab olgandi. Qo‘shma Shtatlar prezidenti 10-iyun kuni Kanada bosh vaziri Mark Karniga maktub yo‘llab, unda yaqin kelajakda mamlakatga qanday savdo tariflari qo‘llanishini aytgan. AQSH allaqachon Kanadaning ba’zi tovarlariga umumiy 25 foizlik boj joriy qilgan. Mamlakat hozirda Tramp m’muriyatining po‘lat, alyuminiy va avtomobilga qo‘yilgan savdo tariflaridan aziyat chekmoqda.
Tramp shu hafta boshida mamlakat savdo hamkorlarining aksariyatiga 15 yoki 20 foizlik yalpi bojlar joriy etgan. Tez orada Yevropa Ittifoqiga ham shu kabi tariflar joriy etilishini ham ta’kidlagandi. U shu hafta AQSHning 20 dan ortiq savdo hamkorlariga, jumladan, Yaponiya, Janubiy Koreya va Shri Lankaga rasmiy xat yo‘llagan. Kanada kabi mamlakatning boshqa savdo hamkorlariga ham ushbu bojlarni 1-avgustgacha joriy etilishi aytilgan.
Ushbu so‘nggi tarif tahdidi Kanada—AQSH—Meksika kelishuvi bilan qamrab olingan tovarlarga nisbatan qo‘llanishi aniq emas. Kanada o‘z tovarlarining 3/4 qismini AQSHga sotadi. U mamlakatning avtomobil ishlab chiqarish markazi va yirik metall yetkazib beruvchisi hisoblanadi. Maktubda aytilishicha, 35 foizlik tariflar ushbu sohalarga amal qilmaydi.
Qo‘shma Shtatlar prezidenti bojlarni “Kanadaning Shtatlarga fentanil oqimini to‘xtatmagani, mamlakatning AQSH sut yetishtiruvchi fermerlariga joriy qilgan yig‘imlari va ikki davlat o‘rtasidagi savdo taqchilligi” bilan izohlagan.
“Agar Kanada fentanil oqimini to‘xtatish uchun harakat qilsa, biz, ehtimol, bu xatga tuzatish kiritish haqida o‘ylab ko‘ramiz. Bu tariflar mamlakatingiz bilan munosabatlarimizga qarab ijobiy yoki salbiy tomonga o‘zgarishi mumkin”, degan Tramp.
Tramp Meksikadan tashqari Kanadani ham AQSHga “juda ko‘p odamlarning va fentanilning kirib kelishiga” yo‘l qo‘yganlikda ayblagan. AQSH bojxona va chegara nazorati ma’lumotlariga ko‘ra, Vashingtonga kirib kelayotgan fentanilning atigi 0,2 foizi Kanada bilan chegarada, qolgan deyarli barchasi Meksika bilan chegarada musodara qilinadi.
Izoh (0)