8-may kuni AQSH prezidentining rafiqasi Jill Bayden va Kanada bosh vaziri Jastin Tryudo oldindan e’lon qilinmagan tashrif bilan Ukrainaga keldi.
Jill Bayden Ujgorodga tashrif buyurdi va u yerda Ukraina prezidentining rafiqasi Olena Zelenskaya bilan uchrashdi. Birinchi xonimlar mahalliy maktablardan biriga bordi, maktabda urush sabab o‘z uylarini tark etishga majbur bo‘lgan ukrainaliklar joylashgan edi.
Shuningdek, 8-may kuni Kanada bosh vaziri Jastin Tryudo ham Ukrainaga keldi. Kanada hukumati rahbari Irpen shahriga tashrif buyurdi.
Shahar merining so‘zlariga ko‘ra, Tryudo ko‘rgan manzarasidan – harbiy obyektlar emas, turar joy binolariga o‘t qo‘yilib, vayron qilinganidan hayratda qolgan.
Ukrainaga Tryudo va Bayden xonimdan tashqari shu kuni Germaniya va Norvegiya parlamentlari rahbarlari Berbel Bas va Masud Garaxoniylar kelishdi. Ukraina prezidenti Vladimir Zelenskiy ular bilan uchrashuv o‘tkazganini o‘zining Telegram-kanalida ma’lum qilib, parlament raislariga ham Kiyevga tashrifi, ham ularning mamlakatlari urush paytida ko‘rsatgan yordami uchun minnatdorchilik bildirdi.
1-may kuni AQSH Kongressining quyi palatasi spikeri Nensi Pelosi kutilmagan tashrif bilan Kiyevga kelgandi. Bunga qadar AQSH davlat kotibi Entoni Blinken va mudofaa vaziri Lloyd Ostin Ukraina poytaxtiga tashrif buyurgan edi. Zelenskiy bilan uchrashuv davomida ular amerikalik diplomatlarni Ukrainaga qaytarishga va yana harbiy yordam yuborishga va’da bergan. 28-aprel kuni esa Kiyevga BMT bosh kotibi Antoniu Gutterish kelgan. Uning tashrifi chog‘ida Kiyev markaziga raketalardan zarba berilgan.
Izoh (0)