Kataloniyaning “Barselona” klubi Germaniyaning “Bavariya” safida to‘p surayotgan markaziy himoyachilar — Kim Min Jae va Dayot Upamekanoni o‘z safiga qo‘shib olishni rejalashtirmoqda. Bu haqda Bayern & Germany nashri xabar berdi.
Manbaga ko‘ra, klub sport direktori Deku ushbu ikki futbolchining yuqori pressing ostida o‘ynash qobiliyati va hujumni orqa chiziqdan boshlab berish mahoratini yuqori baholagan. “Barselona”ning yangi bosh murabbiyi Hansi Flik aynan shunday o‘yin falsafasiga tayanmoqchi.
Biroq kataloniyaliklar ularning transferiga faqatgina Ronald Arauxo yoki boshqa markaziy himoyachilar jamoadan ketgan taqdirdagina amalga oshira oladi. Bu holat klubga yangi futbolchilarni ro‘yxatdan o‘tkazish imkonini beradi.
Qayd etish joiz, “Barselona” Dayot Upamekanoga ilgari ham — u “Leyptsig”da to‘p surgan paytda qiziqish bildirgan edi. Biroq moliyaviy muammolar tufayli transfer amalga oshmagan. Hozir esa “Bavariya” va futbolchi o‘rtasida yangi shartnoma borasida kelishuvga erishilmagan, ayniqsa moliyaviy jihatlar bo‘yicha kelishmovchilik mavjud. “Barselona” esa ushbu vaziyatdan foydalanmoqchi.
Shu bilan birga, “Bavariya” bosh murabbiyi Vensan Kompani Dayot Upamekanoni keyingi mavsum asosiy tarkib futbolchisi sifatida ko‘rmoqda. Ilgariroq Kim Min Jaega jamoadan ketishga ruxsat berilgani haqida xabarlar tarqalgan bo‘lsa-da, Kompani uning ham o‘yin darajasini yuqori baholamoqda.
Ma’lumot uchun, Dayot Upamekanoning “Bavariya” bilan shartnomasi 2026-yilning yozigacha, Kim Min Jaening esa 2028-yilning iyun oyigacha amal qiladi.
Izoh (0)