Toshkentning “Paxtakor” klubi portugaliyalik mutaxassis Pedro Moreyra hamda uning murabbiylar shtabi va futbolchi Jonatan Lukka bilan shartnomalarni bekor qildi. Bu haqda klub matbuot xizmati xabar berdi.
Ma’lum qilinishicha, klub va murabbiy o‘rtasidagi shartnoma ikki tomonning o‘zaro kelishuvi bilan bekor qilingan. Shuningdek, may oyida jarohat olib, safdan chiqqan braziliyalik yarim himoyachi Jonatan Lukka bilan ham muddatidan oldin xayrlashilgan.
Eslatib o‘tamiz, 2025-yil 5-may kuni OAVda Moreyraning iste’foga chiqqani haqida xabarlar tarqalgan edi. Biroq klub bu ma’lumotlarni rad etib, murabbiyning ishdan ketmagani, balki qisqa muddatli ta’tilga chiqqanini ma’lum qilgandi.
Pedro Moreyra 2024-yil dekabr oyida “Paxtakor” bosh murabbiyi etib tayinlangan edi. Uning boshqaruvida “sherlar” 12 ta rasmiy o‘yin o‘tkazib, ulardan 5 tasida g‘alaba qozongan, 7 tasida esa imkoniyatni boy bergan.
Futbolchi Jonatan Lukka esa “Paxtakor” safida jami 8 ta o‘yinda maydonga tushgan edi.
Izoh (0)