Britaniyaning qirg‘oqlarida qariyb 140 yil avval cho‘kib ketgan XIX asrga oid kema topildi. Bu haqda CNN xabar berdi.
1888-yil noyabr oyida “SS Nant” kemasi Kornuoll qirg‘oqlarida cho‘kib ketganida ekipajning 23 a’zosi halok bo‘lgan, ammo halokatning qayerdaligi hozirgacha sir bo‘lib qolgan edi.
Bu kashfiyot g‘avvos Dom Robinson suv ostida idish-tovoq bo‘lagini topganidan so‘ng amalga oshirilgan. Quruqlikka qaytgach, 53 yoshli Robinson singan likopchada Cunard Steamship Company tamg‘asi borligini ko‘rgan. Shu orqali vayron bo‘lgan kemani internetda mavjud ma’lumotlar orqali aniqlashga muvaffaq bo‘lingan.
“Nemis yelkanli kemasi Teodor Ruger paroxodni urib yuborgan o‘sha mash’um kunda ob-havo sharoiti juda yomon edi. U Nant’ning chetini teshib o‘tib, katta teshik ochadi. Bir necha soat davomida ekipaj teshikni to‘ldirish uchun barcha turdagi materiallardan, shu jumladan matraslardan foydalanib, kemani qutqarishga harakat qilgan. Ammo oxir-oqibat ular bu jangda mag‘lub bo‘lishadi va kema juda tez cho‘kib ketadi”, dedi Plimut universiteti tarix professori va dengiz eksperti Garri Bennett.
To‘qnashuv Nant’ning qutqaruv qayiqlariga zarar yetkazgan. Faqat 3 kishi, jumladan, dengizdan topilgan 1 kishi va kemadan sakrab tushgan 2 kishi omon qolgan. Teodor Ruger ham halokatga uchradi, ammo uning qutqaruv qayiqlari yaxshiroq holatda bo‘lgani uchun ekipaj a’zolarining ko‘pchiligi tirik qolgan.
Bu haqda o‘zining YouTube kanalida ma’lum qilgan Robinsonning CNN telekanaliga aytishicha, kema qoldiqlari o‘tgan yilning kuzida Plimutdan 30 mil janubi-sharqda, La-Mansh bo‘g‘ozidan 75 metr chuqurlikda topilgan.
Izoh (0)