Turkiyaning ekran qarshisiga mixlab qo‘yadigan mini seriallari

Klassik ko‘p mavsumli turk seriallari ko‘p vaqt talab qilsa-da, miniseriallar yechimni uzoq kutmasdan qiziqarli voqealardan zavqlanishni istaganlar uchun eng maqbul tanlovdir. Quyidagi ro‘yxatga o‘rtacha 45-50 daqiqa davom etadigan internet seriallar kiritilgan.

“Dilemma”

Neslihan — adolat ramziga aylangan ajoyib jurnalist. Uning sirli yo‘qolishlar va shov-shuvli qotilliklarni fosh etuvchi “Faqat haqiqat” ko‘rsatuvi uni millat vijdoniga aylantiradi. So‘nggi dasturida jinoyat olamining nufuzli shaxslariga qarshi chiqib, “Hatto o‘z o‘g‘lim aybdor bo‘lganida ham, uni ayamasdim!”, deydi.

Bu so‘zlar bashoratga aylanadi. Ko‘p o‘tmay, uning yagona o‘g‘li Jan do‘sti Leylani o‘ldirganlikda ayblanadi. Bir lahzada Neslihanning dunyosi ostin-ustun bo‘ladi: endi u kasbiy burch va onalik mehri o‘rtasida tanlov qilishga majbur.

“Vaqt darvozasi”.

Sinan — iste’dodli va sirli IT daho bo‘lib, u muvaffaqiyatli dasturiy ta’minot kompaniyasini yaratgan. U faqat o‘ziga ishonishga o‘rganib qolgan, sovuq aqli ortida esa o‘tmish soyalari yashiringan.

Nevra — otasidan meros qolgan imperiyani boshqaradigan ajoyib va maqsadga intiluvchi tadbirkor. U hamma narsani nazorat qilishga odatlangan, biroq uning kuchi ham ichki shaytonlarga bas kelolmaydi.

Ularning dunyolari to‘qnashganda, ikkalasi ham kutmagan jo‘shqin sevgi alangalanadi. Ammo ularni ehtirosdan ham ko‘ra ko‘proq narsa — o‘tmishga borib taqaladigan sir bog‘lab turadi.

“Go‘yo erta kelmaydigandek”

Serial yosh aktrisa Manola va tajribali jurnalist Hakan haqida hikoya qiladi. Ular birinchi marta intervyu uchun uchrashishi kerak. Bu uchrashuv ularning baxtli yakunlanish ehtimoli juda kam bo‘lgan chigal munosabatlarining boshlanishi bo‘ladi.

Hakan siyosiy jurnalist, biroq tahririyat kutilmaganda uni nafaqat rollari, balki janjallari bilan ham mashhur bo‘lgan aktrisa Manoladan intervyu olishga yuboradi. U dunyoviy xronikalarni emas, parlament munozaralarini tahlil qilishga o‘rganib qolgan va bunday topshiriqdan ochiqchasiga g‘azablanadi. Manola esa uning kibrli ohangini darhol payqaydi va u bilan xavfli o‘yin o‘ynashga ahd qiladi.

“Qabriston”

Kapitan Onem o‘ta og‘ir jinoyatlarni tergov qiluvchi maxsus bo‘lim boshlig‘i. Bir qarashda uning jamoasi noprofessional ko‘rinadi, buning sababi bor. Ayol rahbarligidagi bu bo‘lim ko‘proq rasmiyatchilik uchun, jinslar tengligini ko‘rsatish va ayollarga qarshi jinoyatlarga e’tibor berayotgandek tuyulish maqsadida tashkil etilgan.

Ish sharoitlari yaxshi emas: jamoaning hatto normal xonasi ham yo‘q — ularga xodimlar hazillashib “qabriston” deb atagan, arxiv hujjatlari bilan to‘lib-toshgan yerto‘la ajratilgan.

Ammo Onem bo‘sh kelmaydi. U ish va oila o‘rtasida muvozanat saqlashga, mukammal tergovchi va mehribon ona bo‘lishga harakat qiladi. Biroq o‘smir qizi Sude bilan munosabatlari yaxshi emas. Qiz otasining halok bo‘lishida onasini ayblaydi va bu ziddiyat Onemning hayotidagi yana bir sinovga aylanadi.

“Turkcha oshxona”

Bosh qahramon Reyyan (Meryem Uzerli)ning eri mashhur oshpaz, o‘zi esa dengiz bo‘yidagi hashamatli restoran egasi. 38 yoshli Reyyan go‘zal ko‘rinishga ega, uning kiyimlari nafis, mukammal qomatini yashirmaydi.

Ammo Reyyanning oilaviy hayoti izdan chiqmoqda, shu bilan birga biznesiga ham xavf tug‘ilmoqda. Aynan shu murakkab davrda uning hayotiga 18 yoshli Uzer (Burak Berkay Akgul) kirib keladi. U Istanbulda ta’lim olishni rejalashtirgan, hozircha esa vaqtinchalik ishlayapti. Uzer o‘tkir xotiraga ega bo‘lgani uchun yangi narsalarni tez o‘rganadi va ularning eng mayda tafsilotlarigacha eslab qoladi. Reyyan va Uzer o‘rtasidagi imkonsiz muhabbat ularning yuragidagi olovni yanada alangalatadi.

“Magarsus”

Saribaxcheda sitrus mevalar savdosi bo‘yicha oilaviy biznes yaxshi daromad keltiradi va tashqaridan qaraganda bu mukammal oila bo‘lib ko‘rinishi mumkin.

Ammo tashqi farovonlik ortida doimiy kelishmovchiliklar yashiringan. Kurak oilasining har bir a’zosi murakkab xarakterga ega shaxs bo‘lib, ularning barchasi o‘z ahamiyatini isbotlashga intiladi. Ular o‘z fikrlarini qat’iyat bilan himoya qiladilar, hurmat talab qiladilar va boshqalarni o‘zlariga bo‘ysundirishga urinadilar. Bu oilada murosaga o‘rin yo‘q — faqatgina hokimiyat uchun kurash, shaxsiy manfaatlar va ustunlik qilish istagi mavjud.

Uch merosxo‘r, uch xil qismat. Tansu — to‘ng‘ich qiz, an’analarga boysunmaydigan o‘tkir aql egasi bo‘lgan isyonkor. Turgut — o‘z xayolot olamida yashovchi jahldor va shuhratparast o‘g‘il. Fatosh — kenja qiz, kamtar, biroq o‘z qarashlariga qat’iy sodiq.

Ularning hokimiyat uchun kurashi, xoinliklari, yashirin ehtiroslar va kutilmagan ittifoqlar oilaviy ishning taqdirini belgilaydi.