Turk aktyor va aktrisalari shaxsiy hayotida ro‘y berayotgan yangiliklar va so‘nggi kunlarda yulduzlar nimalar bilan band ekani haqidagi ma’lumotlarni e’tiboringizga havola qilamiz.
Jan Yaman va Sara Blyuma turmush qurish arafasida
“El Turko” va “To‘rg‘ay” seriallari orqali tanilgan aktyor Jan Yaman 2025-yil iyun oxirida DJ Sara Blyuma bilan uchrashayotganini ma’lum qilgan edi. Oradan bir oy o‘tmay, iyul oxirida u Italiyaning OGGI nashriga intervyu berib: “Men Sarani sevaman, unga turmush qurish taklifini bermoqchiman”, deb ochiq bayonot berdi.
Aktyor yaqin orada unga uylanishini, o‘z tanlovida ishonchi komil ekanini ta’kidladi. Biroq ba’zi muxlisalar uning Sara bilan munosabatni vaqtinchalik deb hisoblamoqda.
Mert Yazijio‘g‘lu “Hukmdor Usmon” serialida bosh rolni o‘ynaydi
“Hukmdor Usmon” serialining navbatdagi qismlarida Usmonning o‘g‘li Orxon rolini Mert Yazijio‘g‘lu ijro etadi. Aktyor bundan avval “Alvon g‘unchalar” loyihasi bilan tanilgan.
“Cheksiz muhabbat” yulduzi Biran Damla Yilmaz turmushga chiqmoqda
Yana bir mashhur turk aktrisasi Biran Damla Yilmaz oila qurmoqda. “Cheksiz muhabbat” seriali orqali tanilgan aktrisa bu haqda muxlislariga ijtimoiy tarmoqlarda ma’lum qildi. U Abdurahmon Aydin ismli tadbirkorga turmushga chiqadi. U qahvaxonalar tarmog‘i egasi bo‘lib, juftlik ikki yildan beri birga ekanini yashirmagan.
Hazal Kaya “Qizil sharbat” serialida ishtirok etadi
“Qizil sharbat” serialining to‘rtinchi mavsumi kutilmagan burilishlarga boy bo‘ladi. Sababi, aktyorlik jamoasiga Hazal Kaya (“Bizning hikoya”, “Maral”) qabul qilindi.
Turk matbuotida tarqalgan ma’lumotlarga ko‘ra, Hazal ijro etadigan obraz asosiy rollardan biri bo‘ladi. Bu esa serialdagi Unal oilasi a’zolarini biroz xavotirga solsa, ajab emas. Hazalning qahramoni kim ekani hozircha noma’lum. Muxlislar uni Aponing noqonuniy qizi yoki marhum Pembening farzandi deb taxmin qilmoqda.
Jamre Baysal ko‘krak qafasida murakkab jarrohlik amaliyotini boshdan kechirdi
“Laylo”, “Meni yashirib qo‘y” va “Taqdir o‘yini” seriallari orqali tanilgan aktrisa Jamre Baysal haftaning boshida rejalashtirilgan operatsiya sababli kasalxonaga yotqizilgan edi. Birsen Altuntasning yozishicha, aktrisa ko‘kragida sakkiz yil davomida asta-sekin o‘sib kelgan o‘simta mavjud.
Jamre muxlislariga murojaat qilib, xavotirga o‘rin yo‘qligini, operatsiya muvaffaqiyatli o‘tganini bildirdi.
“Laylo” va “Ikki kishilik xona” seriallarining yakuniy qismlari avgust oxirida efirga uzatiladi
“Laylo” serialida Alperen Duymaz obrazining chiqib ketishini ko‘plab dizi muxlislari ijobiy qabul qilmagan edi. So‘ng reklama sotuvlari va foyda olishdagi muammolar sababli telekanallar serialning keyingi qismlarni efirga uzatishni vaqtincha to‘xtatdi. So‘nggi ma’lumotlarga ko‘ra, loyihaning yakuniy qismlari avgust oxirida namoyish etiladi.
Mert Ramazon Demir yangi muhabbati haqidagi mish-mishlarni inkor etdi
“Qo‘rg‘on sirlari” seriali yulduzi Mert Ramazon Demir plyajda noma’lum qiz bilan birga ko‘ringanidan so‘ng, muxlislar turli taxminlarni o‘ylab topdi. Biroq aktyor bu mish-mishlarni rad etdi va jurnalistlarga oddiygina: “Hech narsa bo‘lmadi”, deya javob berdi.
Ozge Torer “Hukmdor Usmon” serialini tark etdi
Ushbu tarixiy serialda bosh qahramonning rafiqasi — Bala xotun obrazini ijro etgan Ozge Torer loyihani tark etdi. Bu haqda Birsen Altuntash xabar berdi. Aktrisaning muxlislari esa uni tez orada zamonaviy loyihalarda kutib qolishini bildirdi.
“Qizil sharbat” seriali yulduzi Sila Turko‘g‘lu unashtirildi
Mashhur serialning bosh qahramoni rolini ijro etayotgan Sila Turkog‘lu turmushga chiqishga rozilik berdi. Uning qallig‘i Ata Ayildiz aktrisaga Italiyada, yozgi ta’til vaqtida turmush qurishni taklif qildi. Qiziqarlisi, Turko‘g‘lu bundan roppa-rosa bir yil avval qarindoshining to‘yida kelin gullarini tutib olgan edi.
Izoh (0)