Navoiy viloyatining Navbahor va Qoraqalpog‘iston Respublikasining Chimboy tumanlarida yer maydonlarini sotish bilan bog‘liq holatlar fosh etildi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, Navbahor tumanida fuqaro Z.B. Karmana tumani, “Kumushkon” MFY hududidagi 15 sotix yerni go‘yoki kadastr bo‘limida ishlovchi tanishlari orqali fuqaro M.Q.ning nomiga rasmiylashtirib berishi evaziga 217 mln so‘mni olgan vaqtida ushlangan.
Shuningdek, Chimboy tumanida fuqaro U.Sh. “Kenes” OFY hududidagi davlat zaxirasida bo‘lgan 56 gektar yerni yuqori lavozimda ishlovchi tanishlari orqali fuqaro X.I.ning nomiga rasmiylashtirib berishini vaʼda qilib, undan 54 mln so‘mni olgan vaqtida ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
So‘nggi oylarda yerni noqonuniy sotishga urinish holatlari
2025-yil aprelida Kadastr agentligi Andijon tumani bo‘limi sobiq boshlig‘i qo‘lga olingandi. U bog‘dorchilik uchun ajratilgan 1 gektar yer maydonini Kadastrlar palatasida ishlovchi tanishlari orqali turar joy sifatida toifasini o‘zgartirib, kadastr hujjatlarini rasmiylashtirib berish evaziga 10 000 dollar olgan.
Mart oyida Andijonda advokat stajyori va sherigi 34 ming dollarni noqonuniy olayotganida ushlangandi. Ular pulni 34 sotix noturar yer maydonini kadastr tizimidagi tanishlari orqali xaridor nomiga turar joy sifatida rasmiylashtirib berish evaziga olgan.
Fevralda Farg‘onada fuqaro 2,5 gektar yerni 650 ming dollarga sotishga kelishib, oldindan 100 ming dollarni olgan vaqtida ashyoviy dalillar bilan ushlangandi. Toshkent viloyati Ohangaron tumanida joylashgan va qishloq xo‘jaligiga mo‘ljallangan 32 gektar yerni 2,4 mln dollarga noqonuniy sotmoqchi bo‘lgan shaxs qo‘lga olingandi.
Surxondaryo viloyatida qishloq xo‘jaligiga mo‘ljallangan 45 sotix yerni 60 ming dollarga sotishga kelishib, 56,7 ming dollar va 43 million so‘m olgan vaqtida qo‘lga tushgandi. Xorazm viloyatining Urganch tumanida fuqaro davlat zaxirasida bo‘lgan 24 sotix yer maydonini kadastr tizimida ishlovchi tanishlari orqali xaridor nomiga rasmiylashtirib berish evaziga 45 ming dollar va 13 million so‘m olgan vaqtida ushlangandi.
Izoh (0)