InterContinental Tashkent mehmonxonasida “Jamoat transportini raqamlashtirish va rivojlantirish istiqbollari” mavzusida muhim anjuman bo‘lib o‘tdi. Tadbirda sohaga oid yangi texnologiyalar, aqlli boshqaruv tizimlari va elektron to‘lov infratuzilmalari haqida so‘z yuritildi. Ayniqsa, ATTO transport to‘lov tizimining 5 yillik faoliyatiga oid natijalar eʼtibor markazida bo‘ldi.
“Raqamlashtirish, o‘z navbatida, transportning transformatsiyasi uchun yana bir muhim tayanchdir. Ilg‘or texnologik yechimlarni joriy etish xizmatlarga kirishni osonlashtiradigan va foydalanuvchi tajribasini yaxshilaydigan integratsiyalashgan transport tizimini yaratish imkonini beradi. Avtomatlashtirilgan to‘lov tizimlari, mobil ilovalar va harakatni boshqarish uchun intellektual platformalar — bularning barchasi jarayon ishtirokchilari uchun yangi imkoniyatlar ochadi”, dedi O‘zbekiston transport vazirining o‘rinbosari Ilhomjon Abdug‘afforov.
Transport vazirligi matbuot kotibi Navro‘z Ashurmatov quyidagicha taʼkidladi:
“Yo‘lovchilarni bevosita haydovchilar yoki chiptachilar bilan pul oldi-berdisi munosabatlari ishtirokida ko‘pincha mojaroli vaziyatlar yuzaga kelardi. Avtobuslarda “kunlik reja” degan tushunchaning mavjudligi haydovchilarni asosiy yo‘lovchi oqimi katta bo‘lgan metro bekatlarida to‘xtab turishga majbur qilardi. Bu holat esa avtobus salonida bo‘lgan yo‘lovchilarning haqli eʼtirozlariga sabab bo‘layotgan edi. Aynan elektron to‘lov tizimiga to‘liq o‘tilgani natijasida bugungi kunda ushbu muammolar to‘liq bartaraf etildi”.
So‘nggi yillarda ATTO shahar jamoat transportida naqdsiz to‘lov tizimini yo‘lga qo‘yishda katta rol o‘ynadi. Bugungi kunda tizim O‘zbekistonning ko‘plab yirik shaharlarini qamrab olgan. U naqd pul aylanishida tushadigan yukni kamaytirib, yo‘lovchilarning yo‘lini osonlashtirdi va transport operatorlari uchun yangi imkoniyatlar ochdi.
ATTO platformasi shahar mobilligini raqamli transformatsiya qilish sohasida innovatsion loyiha sifatida ishga tushirilgan. Besh yil mobaynida u to‘liq ekotizimga aylandi va bank kartalari, QR-to‘lovlar, davlat va xususiy tashuvchilar bilan uzviy bog‘landi. Raqamli tizim jamoat transportidagi ko‘plab muammolarga amaliy yechim bo‘ldi.
“Bugungi kunda shahar jamoat transportidan tushayotgan kunlik tushumlarning 100 foizi to‘g‘ridan-to‘g‘ri mahalliy byudjetga yo‘naltirilishi taʼminlandi,” — dedi Transport vazirligi matbuot kotibi Navro‘z Ashurmatov.
Uning so‘zlariga ko‘ra, elektron to‘lov tizimiga o‘tgan yo‘lovchilar soni 90 foizga oshgan. Endilikda har bir yo‘nalishdagi avtobusda qancha tranzaksiya amalga oshirilayotgani va aynan shu yo‘nalishlarda nechta avtobus harakatlanayotgani haqida to‘liq maʼlumot mavjud. Bu maʼlumotlar transport mutaxassislari uchun juda muhim. Chunki yo‘lovchi oqimidan kelib chiqib, avtobuslar sonini ko‘paytirish, harakatlar oralig‘ini qisqartirish yoki kerak bo‘lsa, ularni sig‘imi kattaroq transport vositalariga almashtirish mumkin bo‘lmoqda. Bu orqali yo‘lovchi oqimini to‘g‘ri taqsimlashga erishilmoqda.
ATTO bugungi kunga kelib 13 ta hududda joriy etilgan. Oyiga 60 milliondan ortiq tranzaksiya aynan shu tizim orqali amalga oshirilmoqda. ATTO tizimida 1,3 million mobil ilova foydalanuvchisi va 2 million chiqarilgan karta mavjud. Jamoat transportini raqamlashtirish nafaqat qulaylik, balki aholiga rag‘bat ham berishni ko‘zlayapti. Shu sababli ATTO tizimi va tijorat banklari hamkorligida turli aksiyalar o‘tkazilmoqda.
2024-yildan buyon “Ipak Yo‘li” to‘lov tizimi jamoat transportida taqdim etilgan chegirmalar orqali 13 milliard so‘mdan ortiq mablag‘ni tejashga yordam bergan.
Yaqinda Uzum ham 2025-yil uchun o‘z sarhisobini taqdim etdi — u yerda 12 milliard so‘mdan oshiq pul ko‘rsatilgan. Hozirda esa Uzcard butun O‘zbekiston bo‘ylab “Manzillar yaqinroq” aksiyasini o‘tkazmoqda. Bu haqda ATTO ijrochi direktori Davron Shoyakubov maʼlum qildi.
Izoh (0)