InterContinental Ташкент меҳмонхонасида “Жамоат транспортини рақамлаштириш ва ривожлантириш истиқболлари” мавзусида муҳим анжуман бўлиб ўтди. Тадбирда соҳага оид янги технологиялар, ақлли бошқарув тизимлари ва электрон тўлов инфратузилмалари ҳақида сўз юритилди. Айниқса, ATTO транспорт тўлов тизимининг 5 йиллик фаолиятига оид натижалар эътибор марказида бўлди.
“Рақамлаштириш, ўз навбатида, транспортнинг трансформацияси учун яна бир муҳим таянчдир. Илғор технологик ечимларни жорий этиш хизматларга киришни осонлаштирадиган ва фойдаланувчи тажрибасини яхшилайдиган интеграциялашган транспорт тизимини яратиш имконини беради. Автоматлаштирилган тўлов тизимлари, мобил иловалар ва ҳаракатни бошқариш учун интеллектуал платформалар — буларнинг барчаси жараён иштирокчилари учун янги имкониятлар очади”, деди Ўзбекистон транспорт вазирининг ўринбосари Илҳомжон Абдуғаффоров.
Транспорт вазирлиги матбуот котиби Наврўз Ашурматов қуйидагича таъкидлади:
“Йўловчиларни бевосита ҳайдовчилар ёки чиптачилар билан пул олди-бердиси муносабатлари иштирокида кўпинча можароли вазиятлар юзага келарди. Автобусларда “кунлик режа” деган тушунчанинг мавжудлиги ҳайдовчиларни асосий йўловчи оқими катта бўлган метро бекатларида тўхтаб туришга мажбур қиларди. Бу ҳолат эса автобус салонида бўлган йўловчиларнинг ҳақли эътирозларига сабаб бўлаётган эди. Айнан электрон тўлов тизимига тўлиқ ўтилгани натижасида бугунги кунда ушбу муаммолар тўлиқ бартараф этилди”.
Сўнгги йилларда ATTO шаҳар жамоат транспортида нақдсиз тўлов тизимини йўлга қўйишда катта рол ўйнади. Бугунги кунда тизим Ўзбекистоннинг кўплаб йирик шаҳарларини қамраб олган. У нақд пул айланишида тушадиган юкни камайтириб, йўловчиларнинг йўлини осонлаштирди ва транспорт операторлари учун янги имкониятлар очди.
ATTO платформаси шаҳар мобиллигини рақамли трансформация қилиш соҳасида инновацион лойиҳа сифатида ишга туширилган. Беш йил мобайнида у тўлиқ экотизимга айланди ва банк карталари, QR-тўловлар, давлат ва хусусий ташувчилар билан узвий боғланди. Рақамли тизим жамоат транспортидаги кўплаб муаммоларга амалий ечим бўлди.
“Бугунги кунда шаҳар жамоат транспортидан тушаётган кунлик тушумларнинг 100 фоизи тўғридан-тўғри маҳаллий бюджетга йўналтирилиши таъминланди,” — деди Транспорт вазирлиги матбуот котиби Наврўз Ашурматов.
Унинг сўзларига кўра, электрон тўлов тизимига ўтган йўловчилар сони 90 фоизга ошган. Эндиликда ҳар бир йўналишдаги автобусда қанча транзакция амалга оширилаётгани ва айнан шу йўналишларда нечта автобус ҳаракатланаётгани ҳақида тўлиқ маълумот мавжуд. Бу маълумотлар транспорт мутахассислари учун жуда муҳим. Чунки йўловчи оқимидан келиб чиқиб, автобуслар сонини кўпайтириш, ҳаракатлар оралиғини қисқартириш ёки керак бўлса, уларни сиғими каттароқ транспорт воситаларига алмаштириш мумкин бўлмоқда. Бу орқали йўловчи оқимини тўғри тақсимлашга эришилмоқда.
ATTO бугунги кунга келиб 13 та ҳудудда жорий этилган. Ойига 60 миллиондан ортиқ транзакция айнан шу тизим орқали амалга оширилмоқда. ATTO тизимида 1,3 миллион мобил илова фойдаланувчиси ва 2 миллион чиқарилган карта мавжуд. Жамоат транспортини рақамлаштириш нафақат қулайлик, балки аҳолига рағбат ҳам беришни кўзлаяпти. Шу сабабли ATTO тизими ва тижорат банклари ҳамкорлигида турли акциялар ўтказилмоқда.
2024 йилдан буён “Ипак Йўли” тўлов тизими жамоат транспортида тақдим этилган чегирмалар орқали 13 миллиард сўмдан ортиқ маблағни тежашга ёрдам берган.
Яқинда Uzum ҳам 2025 йил учун ўз сарҳисобини тақдим этди — у ерда 12 миллиард сўмдан ошиқ пул кўрсатилган. Ҳозирда эса Uzcard бутун Ўзбекистон бўйлаб “Манзиллар яқинроқ” акциясини ўтказмоқда. Бу ҳақда ATTO ижрочи директори Даврон Шоякубов маълум қилди.
Изоҳ (0)